Primeiru-Ministru, Taur Matan Ruak, Prezide Reuniaun Konsellu Ministru iha Salaun Ministériu Finansas, Aitarak-Laran, kuarta(29/04).Imajen/Egas Cristovão

DILI, 29 abríl 2020 (TATOLI) – Hafoin Prezidente Repúblika dekreta estensaun Estadu Emerjénsia  iha loron 28 abríl hahú tuku 00:00 to’o loron 27 maiu 2020 iha tuku 23:59, iha reuniaun Konsellu Ministru (KM) kuarta ne’e aprova Dekretu Governu ne’ebé aprezenta husi Primeiru-Ministru, Taur Matan Ruak, kona-ba medida ezekusaun.

Parlamentu Nasionál fó autorizasaun ba deklarasaun Estadu Emerjénsia ho rezultadu votasaun a-favór 37, kontra 23, absteinsaun 3 no auzente ida.

Medida ezekusaun ba renovasaun deklarasaun Estadu Emerjénsia ne’e fó sai liuhosi Dekretu Prezidente Repúblika númeru 29/2020, 27 marsu 2020, hodi hatán ba ameasa husi surtu COVID-19 nian.

“Hanoin ba renovasaun deklarasaun Estadu Emerjénsia ne’e, Governu liuhosi Dekretu ida atu asegura ba ezekusuan adotasaun ba medida sira ne’ebé presiza hodi prevene moras ne’ebé mak konteña ho pandemia, salva vida no hodi asegura subsisténsia ba kadeia abastesimentu sasán no servisu esensiál ba ita-nia populasaun, maski limita sira-nia direitu no liberdade fundamentál balun”, refere nota imprensa ne’ebé Agência Tatoli asesu hafoin reuniaun ezekutivu iha Salaun Ministériu Finansa, Aitarak-Laran.

Notísia Relevante: PN Aprova Pedidu Estensaun EE, CNRT Vota Kontra

Prezidente Repúblika Promulga Estensaun Estadu Emerjénsia

Dekretu Governu númeru 3/2020, 28 marsu, sei mantein nafatin proibisaun ba entrada estranjeiru iha territóriu nasional, exsetu estranjeiru ne’ebé presta atividade profisionál iha setór petrolíferu.

Diploma ne’e, haktuir regra kontrolu sanitáriu ba entrada no saída sira iha territóriu nasionál sira sei mantein hanesan medida anteriór.

Kona-ba regra distansiamentu sosiál, diploma ne’e refere liubá ajente sira husi forsa seguransa tenke sensibiliza ba ema hotu hodi kumpre ba  regra sira ne’ebé mak define tiha ona.

“Bandu ema atu labele hamriik hamutuk ka  hamriik iha grupu ho ema barak, no ba ema sira ne’ebé la kumpre orden kumprimentu ne’e sei konsidera katak konstitui krime desobediénsia, no sei identifika ema sira ne’ebé mak la respeita regra ka la kumpre regra no sei bele lori sira ba Ministériu Públiku”, refere nota ne’e.

Dekretu Governu ne’e mós fó dalan ba atividade transporte públiku sira, hanesan veíkulu sira tenke fase no hamós loron-loron iha karreta laran antes hahú atividade no mós motorista, tripulasaun no pasajeiru sira tenke uza máskara protesaun no evita kualkér kontaktu fíziku.

Kona-ba regra asessu ba estabelesimentu komersiál sira no prestasaun servisu, sei mantein nafatin regra sira kona-ba utilizasaun obrigatóriu máskara ba kliente no funsionáriu sira, inklui fase liman bebeik antes tama ba servisu fatin no respeitu ba distánsia fízika pelu menus metru ida.

“Forsa seguransa sira no inspetór husi autoridade seguransa ai-han nian no ekonómika bele organiza ema sira ne’ebé tama no sai iha estabelesimentu ba individu, tanba ema ne’ebé mak la kumpre regra sira ne’e bele halo identifiksaun ba individu ne’e no bele lori ba aprezenta iha Ministériu Públiku”, katak nota ne’e.

Regra sira ne’e sei aplika mós ba merkadu sira hotu, ho disponibilizasaun husi parte autoridade sira no administrasaun munisipál ho kondisaun ne’ebé nesesária no husi kontrolu kumprimentu ba regra sira ne’ebé estabelese tiha ona.

Kona-ba vendedór ambulante sira hotu tenke uza permanente máskara protesaun no tenke mantein distánsia pelu menus metru ida entre vendedór ambulante sira seluk.

Sei mantein medida ne’ebé estabelese tiha ona kona-ba funsionamentu administrasaun públika no asesu ba iha kada instalasaun, inklui aumenta mós lista husi servisu públiku ne’ebé sei konsidera esensiál no define lista atividade ne’ebé suspende direitu ba greve.

Dekretu Governu ne’ebé aprovadu ona refere mós ba membru Governu ne’ebé responsável husi saúde, bele determina kuandu haree katak nesesáriu atu fó protesaun ba saúde públika, iha rekuizisaun temporária ba espasu no estabelesimentu partikulár sira.

“Kuandu iha kazu balun ne’ebé mak devidamente justifika, Konsellu Ministru bele rekezita sasán imóvel ka móvel husi partikulár”, haktuir nota ezekutivu.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here