Vendedores iha estrada ninin Tasitolu.Imajen/TATOLI

DILI, 29 abril 2020 (TATOLI)–Governu liuhosi Ministériu Saùde (MS) hamutuk ho Autoridade Munisípiu Dili, ohin, halo sensibilizasaun distansiamentu fíziku ba vendedór no kompradór sira iha bazár Tasi Tolu hodi hadook-an hosi propagasaun surtu COVID-19 no moras denge.

Prezidente Autoridade Munisípiu Dili, Gaspar Soares hateten, vendedór no kompradór sira tenke kumpre regra hosi Ministériu Saùde no Organizasaun Mundiál Saùde nian katak tenke fase liman beibeik.

Prezidente Autoridade Munisípiu Dili, Gaspar Soares. Imajen Tatoli/Osória Marques.

“Ha’u hakarak aproveita opurturnidade ida ne’e hodi kontinua informa ba komunidade sira tomak katak vendedór no kompradór sira iha fatin ida ne’e katak moras COVID-19 iha ita-nia rain ona. Tanba ne’e, ha’u fó hanoin nafatin ba komérsiante tomak liuliu vendedór no kompradór sira atu kumpre nafatin regra. Primeiru mak tenke fase liman ho sabaun ne’ebé mak prepara ona iha fatin molok faan no sosa sasán no mós bainhira fila ba uma mós fase liman beibeik,” dehan Prezidente Autoridade Munisípiu Dili, Gaspar Soares, bainhira hala’o sensibilizasaun iha bazár Tasi Tolu, Dili, kuarta ne’e.

Nia hatutan, aleinde ne’e husu ba vendedór no kompradór sira tenke uza máskara bainhira halo atividade komérsiu iha bazár ne’e hodi hadook imi-nia an hosi moras Coronavirus.

“Ha’u haree barak mak la uza máskara.  Tanba ne’e, husu ba ema hotu atu uza máskara bainhira faan no no mai sosa sasán ruma. Ho uza maskra imi salva imi-nia an no salva ema seluk,” nia rekomenda.

Nune’e mós, nia hateten, bainhira hala’o atividade faan no sosa kompradór no vendedór sira tenke halo distansiamentu fíziku no distansiamentu sosiál katak dookk malu liu mak metru ida entre kompradór no vendedór sira.

Aleinde ida ne’e, Gaspar Soares informa, agora Timor-Leste hasoru surtu COVID-19 no mós moras denge tanba daudaun ne’e Munisípiu Dili rejistu kazu denge hamutuk 689. Hosi númeru ida ne’e, ema na’in-neen (6) mak mate ona no ema hirak ne’e mesak labarik tinan lima mai kraik de’it.

“Ha’u hakarak nafatin bolu atensaun ba komunidade sira maske ita hasoru surtu COVID-19 maibé keta haluha mós atensaun ba moras denge ne’e. Nune’e, husu ba ita-boot sira atu hamoos uma-laran no labele tara roupa butuk-butuk iha kuartu laran. Labele husik bee nalihun iha uma-laran, uma-oin no uma sorin-sorin atu nune’e susuk labele labele tata no labele kria susuk,” nia informa.

Nia alerta ba komunidade sira atu komunidade ida-idak halo limpeza beibeik iha sira-nia uma hun atu nune’e susuk labele transmite moras ba ema no mós soe foer iha nia fatin.

Entretantu, Diretora Saùde Munisípiu Dili, Agostinha Segurado hatutan, daudaun ne’e presiza ema hotu nia kontribuisaun no partisipasaun ba prevensaun COVID-19 no moras denge iha Timor-Leste.

“Ita presiza prepara-an atu hasoru moras Covid-19 no moras dengue. Tanba ne’e, husu ba inan-aman sira ne’ebé negósia iha Tasi Tolu ne’e atu hamoos fatin no labele soe foer arbiru. Husu ita hotu nia kontribuisaun no partisipasaun másimu atu prevene moras refere hosi Timor-Leste,” nia dehan.

Ho ida ne’e, diretora ne’e apela ba autoridade lokál sira atu hamutuk ho Governu liuliu Ministériu Saùde hodi kontinua kontrola ba prevensaun ba moras surtu COVID-19 no moras denge.

“Ha’u mós husu ba autoridade lokál sira no ba komunidade sira atu kontribui no kombate. Labele hein de’it Ministériu Saùde no Autoridade Munisípiu Dili sensibiliza mak foin halo tuir. Maibé, ita-boot sira-nia parte mós tenke haree no prevene,” nia sujere.

Notísia Relevante: Governu Sensibiliza Distánsiamentu Fíziku iha Merkadu

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here