Primeiru-Ministru, Taur Matan Ruak, Prezide Reuniaun Konsellu Ministru iha Salaun Ministériu Finansas, Aitarak-Laran, kuarta(29/04).Imajen Tatoli/Egas Cristovão

DILI, 29 abríl 2020 (TATOLI) – Governu liuhosi reuniaun Konsellu Ministru (KM) aprova ona projetu alterasaun daruak ba Estatutu Militár husi FALINTIL-Forsa Defeza Timor-Leste (F-FDTL).

“Konsellu Ministru aprova Dekretu-Lei númeru 7/2014, 12 marsu. Alterasaun ida-ne’e atu kompatibiliza Estatutu F-FDTL ho konjuntu husi dokumentu estruturante iha área defeza nian ho atuál kontestu legál”, refere nota imprensa ne’ebé Agência Tatoli asesu hafoin reuniaun ezekutivu iha Salaun Ministériu Finansa, Aitarak-Laran, kuarta ne’e.

Notísia Relevante: Xefe Estadu Husu Revee Estatutu Militár

Alterasaun ba projetu ne’e, foku liu ba Lei Defeza Nasionál, Konseitu Estratéjiku Defeza Nasionál, Konseitu Estratéjiku Militár, Sistema Forsa Nasionál, Misaun Forsa Armada sira no Dispozitivu F-FDTL nian.

Antes ne’e, Prezidente Repúblika, Francisco Guterres ‘Lú-Olo’ husu ba Governu atu halo revizaun ba estatutu militár no mós pesoál militár ba instituisaun F-FDTL tanba seidauk define loloos sira nia direitu, devér no karatéristika nu’udar forsa.

Tuir Xefe Estadu, estatutu militár no estatutu pesoál militár importante atu dezenvolve liután forsa iha futuru.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here