Vise Primeiru-Ministru no Ministru Planu no Ordenamentu, José Maria dos Reis. Imajen/Espesiál

DILI, 29 abríl 2020 (TATOLI)—Partidu Frente Revolucionária de Timor-Leste Independente (FRETILIN) rejeita informasaun ne’ebé espalla iha públiku kona-ba Sekretáriu Jerál, Mari Alkatiri, no Prezidente CNRT, Kay Rala Xanana Gusmão, atu hasou malu tanba to’o ohin loron seidauk iha komunikasaun ka aprosimasaun ruma.

Liuhosi komunikadu, Adjuntu Sekretáriu Jerál FRETILIN, José Reis informa, iha loron hirak liubá, Sekretáriu Jerál FRETILIN, Mari Alkatiri fó-sai nota klarifikasaun ida ba públiku ne’ebé husik mensajen klaru tebes katak FRETILIN apoia VIII Governu atu-bele garante estabilidade governativa no buka dalan atu hakotu impase polítiku iha rai-laran.

“Ohin, ema irresponsável balu lansa rumor iha públiku katak Xanana Gusmão ho Sekretariu Jeral FRETILIN, Mari Alkatiri, sei hasoru malu iha tempu badak nia laran. Ha’u hakarak informa ba públiku tomak katak informasaun kona-ba Xanana Gusmão no Sekretáriu Jerál Mari Alkatiri atu hasoru malu ne´e falsu, tanba to’o ohin loron seidauk iha komunikasaun ka aprosimasaun ruma mai FRETILIN no hosi señor Xanana atu hasoru malu ho Sekretariu Jeral FRETILIN,” Adjuntu Sekretáriu Jerál FRETILIN, José Reis, informa liuhosi komunikadu imprensa ne’ebé Ajénsia TATOLI asesu, kuarta ne’e.

José Reis lori lideransa FRETILIN nia naran, apelu ba kuadru, militante no simpatizanti FRETILIN sira hotu no husu ba públiku tomak atu labele monu ba lia-falsu sira-ne’ebé ema balun fó-sai.

“Informasaun falsu sira-ne’e bele mai ho intensaun atu hamosu deskonfiansa no atu koko estraga serbisu tomak ne’ebé líder sira hala’o daudaun atu buka estabilidade governativa no hakotu impase polítiku iha rai laran,”  Adjuntu José Reis hateten.

Nia afirma, hosi uluk kedas to’o ohin loron, FRETILIN sempre buka atu inkluzivu no buka dalan atu bele kontribui ba estabilidade nasionál no atu hadi’a povu nia moris atu-bele sai hosi mukit.

José Reis dehan, FRETILIN sempre nakloke atu hasoru malu ho forsa polítika hotu-hotu no sempre informa ho transparénsia kona-ba rezultadu sira ne’ebé reál no importante ba nasaun no povu Maubere no Buibere tomak.

“Aban bain rua, iha tempu badak ka naruk, se iha duni enkontru ruma, FRETILIN rasik mak sei informa ba públiku tomak,” Adjuntu Sekretáriu Jerál, José Reis konklui.

Notísia Relevante: FRETILIN Kontinua Apoia VIII Governu Konstitusionál

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here