Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 29 abríl 2020 (TATOLI) –Dadus kumulativu ba situasaun surtu Coronavirus ka COVID-19 iha Timor-Leste ba loron ohin nian, kuarta (29/04/2020), hatudu katak, kazu konfirmadu foun zero (0), nune’e, horiseik to’o agora, sei mantein ho kazu konfirmadu na’in-24.

Notísia Relevante : Kazu Konfirmadu COVID-19 Mantein 24, Totál Teste Sa’e ba 597

Liuhosi konferénsia imprensa iha Sentru Mídia, Sala Situasaun Sentru Integradu Jestaun Krize (CIGC) iha Sentru Konvensaun Dili (CCD), portavós CIGC, Rui Maria de Araújo, informa, totál kazu rekupera ka kuradu na’in-neen (6), (nain-rua kazu konfirmadu, na’in-haat  kazu provavel).

Rui Araújo haktuir tan, total kazu konfirmadu ne’ebé sei iha izolamentu iha Vera Cruz  22,  total kumulativu ezame laboratóriu 629 (horiseik iha 597), total kumulativu hein rezultadu laboratóriu 215 (horiseik iha 206), total kumulativu rezultadu laboratóriu negativu 390 (horiseik 367), total ema iha kuarentena ka konfinamentu obrigatóriu  436; hosi ne’e na’in-38 auto-kuarentena iha munisípiu no na’in-ualu (8) iha Dili, 324 iha fasilidade governu iha Dili, no 66 iha fasilidade governu nian iha munisípiu).

“Total kumulativu ema ne’ebé liu ona periodu kuarentena ka konfinamentu obrigatóriu na’in-1.712, kompostu hosi na’in-350 iha munisípiu no 1.362 iha Dili,” informa Rui Araújo.

Kona-ba situasaun COVID-19 iha Munisípiu Liquiça, Rui Araújo tenik, Ministériu Saúde ho CIGC  esforsu atu halo triage ba kazu suspeitu Covid-19, ho esforsu atu halo vijilánsia sentinela hodi determina se iha ona transmisaun iha komunidade ka la’e, nafatin la’o hela.

“To’o ohin meiu-dia, ekipa vijilánsia epidemiolojia hosi Munisípiu Liquiça rekolla ona 69 amostra espésime, 27 negativu, 33 sei hein rezultadu laboratóriu,” hateten Rui Araújo.

Nia afirma tan, Ministériu Saúde prepara hela planu asaun atu espande métodu vijilánsia sentinela, ba munisípiu no Sentru Saúde sira hotu iha Timor-Leste nia-laran tomak.

Esklarese Duvida  Kona-ba Doasaun hosi Governu Xina

Liuhosi konferénsia imprensa ne’e,  Rui Maria de Araújo, lori CIGC nia-naran  hakarak esklarese dúvida iha públiku nia leet, kona-ba sasán doasaun hosi povu no Governu Xina.

Nia afirma katak, Organizasaun Mundiál Saúde (OMS) hateten ona katak, ema ne’ebé simu sasán pakote hosi Xina, la iha risku atu hetan da’et virus corona foun (Covid-19). Hosi análize ne’ebé halo ona, komprovadu katak virus corona la moris naruk iha buat sira hanesan karta ka sasán iha pakote.

Rui Araújo tenik, tékniku sira hosi Ministériu Saúde ho apoiu hosi OMS verifika ona espesifikasaun no kualidade hosi ekipamentu no bens konsumiveis sira ne’ebé to’o horiseik hosi Xina, no hato’o ona informasaun, katak buat hotu tuir hela espesifikasaun OMS nian.

“Mai ita hotu agradese ba povu no governu Xina nia laran-luak ba povu Timor-Leste,”  hateten eis Primeiru-Ministru no eis Ministru Saúde ne’e.

Jornalista    : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here