Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 29 abríl 2020 (TATOLI) –Portavós Sala Situasaun Sentru Integradu Jestaun Krize (CIGC), Rui Maria de Araújo, ohin, liuhosi konferénsia imprensa, hato’o agradese  ba populasaun iha Timor-Leste nia laran tomak, tanba komportamentu ne’ebé ezemplár durante períodu dahuluk Estadu Emerjénsia, hosi loron 28 marsu to’o loron 27 abríl tinan 2020.

Notísia Relevante : COVID-19, Kazu Konfirmadu 24 La iha Mudansa

“Ho ita-boot sira hotu ninia kolaborasaun, Timor-Leste konsege halo serku metin, ba virus SARS-CoV-2 ne’ebé provoka moras COVID-19, no limita virus ne’e da’et de’it iha grupu ka ‘’cluster’’ hitu, ne’ebé to’o agora, ita sei bele kontrola,” hateten Rui Araujo iha Sentru Mídia Sala Situasaun CIGC, Sentru Konvensaun Dili (CCD).

Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo, lori CIGC nia-naran konvida populasaun Timor-Leste tomak, atu ida-idak assume ninia misaun iha kombate ba COVID-19, durante fulan hirak tuir mai, liuhosi kumpre ida-idak ninia misaun, maka hanesan labele husik virus tama iha ema-nia isin. Se karik tama ona, labele husik virus ne’e da’et tutan ba ema seluk, liu-liu ba ema ferik no ba ema katuas, labarik sira no ema ne’ebé iha moras króniku ruma.

“Oin-sá bele kumpre misaun ida ne’e? Ita hotu hatene ona: tuur hakmatek iha uma; lalika sai arbiru, ka halibur-malu beibeik; fase  liman beibeik ho sabaun; labele kose liman ba matan, inus ho ibun, uza máskara bainhira sai hosi uma. Uainhira mear, inus-ben ka fani, uza máskara ka uza ita-nia sikun hodi tahan netik kaben-tasak labele katik sai ba monu iha rai ka iha fatin-seluk,” Rui Araújo esplika.

Iha uma, Rui Araújo afirma-tan, lalika hakuak, rei ka bensa ferik, katuas, labarik, no ema ne’ebé iha moras króniku. “Ida ne’e maka misaun no asaun sidadaun ida-idak tenke hala’o. Mai ita hamutuk implementa ida ne’e,” Rui tenik tan.

Nia afirma-tan, CIGC nafatin apela ba populasaun tomak katak, bainhira iha sintoma infesaun respiratória aguda (IRA) hanesan, isin-manas, kakorok moras, mear, inus-ben, ruin-ki’ik-boot siin hotu, halo favor ba konsulta iha sentru saúde ka ospitál sira.

Nia subliña mós katak, se lakohi atu hetan moras Covid-19 ne’ebé grave ka kritiku, halo favor para ona fuma sigarru ka tabaku, no para ona hemu tua.

Rui Araújo lori CIGC nia-naran husu ho favor atu kolabora nafatin no partisipa ho disiplina iha distansiamentu sosiál, iha distansiamentu fíziku, iha ijiene no protesaun pesoál.

“Maluk sira ne’ebé kompleta ona konfinamentu obrigatóriu ka kuarentena, bainhira sente iha sintoma karik, favor kontakta númeru 119,” afirma Rui Maria de Araújo.

Jornalista     : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here