Vendedor sira uja maskra hodi prevene an moras COVID-19 hodi kontinua fila liman iha merkadu Taibesi.Imajen/Antonio Goncalves

DILI, 29 abril 2020 (TATOLI)–Xefe Departamentu Jestaun Merkadória Munisípiu Dili, Berta Santa Gonçalves Vieira, apela ba negosiante no komunidade sira atu labele faan sasán hanesan modo-tahan sira tau iha rai tanba fó impaktu ladi’ak ba saùde bainhira konsumu.

Nia sujere atu negosiante sira ne’ebé faan sasán hanesan modo-tahan sira ne’e tenke haloot ka rai iha fatin ne’ebé moos no di’ak, atu nune’e ema bele sosa sasán sira ho saudavel.

Berta Santa

“Ha’u husu ba ita-boot sira atu aranza meza oan ida hodi faan iha leten. Se lae, modo-tahan ne’ebé tau iha rai bele fó impaktu ladi’ak ba ita-nia saùde bainhira ita konsumu. Tanba bainhira ita tau iha rai, ema la’o ba mai rai rahun kona no dala ruma ema tafui kabeen iha rai, ita la haree no tau modo ba leten, entaun ita sosa hodi han, ita sei hetan moras,” dehan Xefe Departamentu Jestaun Merkadória, Berta Santa Gonçalves Vieira, iha programa sensibilizasaun regra prevensaun COVID-19 ba negosiante sira iha iha bazár Tasi Tolu, Dili, kuarta ne’e.

Aleinde faan sasan iha rai, Berta Santa dehan, atu kontinua mantein fatin ne’ebé mak imi faan ne’e no husu vendedór sira atu labele faan sasán mai liu liur ka iha estrada ninin tanba taka movimentu ema ho transporte hodi la’o.

“Ha’u husu ba vendedór sira atu mantein imi-nia fatin iha Loza oin labele lori sasan hodi tau iha estrada ninin no laiha espasu ba ema no kareta hodi la’o,” nia rekomenda ba negosiante sira.

Nia hateten, karik faan sasan entaun tenke loke dalan ba loza nune’e kompradór sira mós bele asesu ba loza.

Notísia Relevante: Governu Sensibiliza Regra Prevensaun COVID-19 ba Vendedór-Kompradór Sira

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here