Primeiru-Ministru, Taur Matan Ruak, Prezide Reuniaun Konsellu Ministru iha Salaun Ministériu Finansas, Aitarak-Laran, kuarta(29/04).Imajen Tatoli/Egas Cristovão

DILI, 29 abríl 2020 (TATOLI) – Konsellu Ministru (KM) aprova Projetu Dekretu-Lei, ne’ebé aprezenta husi Ministru Koordenadór Asuntu Ekonómiku interinu, Fidelis Manuel Leite Magalhães, hamutuk ho Governadór Banku Sentrál Timor-Leste (BCTL, sigla portugés), Abraão de Vasconselos, kona-ba alterasaun dahuluk ba Dekretu-Lei númeru 23/2017, 12 jullu, Sistema Garantia Kréditu.

Intensaun ba alterasaun ida-ne’e, hodi bele alastra liután asesu Sistema Garantia kréditu ba mikro-empreza sira atu hasa’e tipu atividade ekonómika sira ne’ebé tenke elejível ba programa ne’e rasik.

“Iha alterasaun ne’e ita alastra tan atu laós de’it husi banku mak fó kréditu, maibé insitutisaun kréditu sira no mikro finansa sira mós bele fó kréditu liuhosi apoia Governu ba insitituisaun finaseiru sira atubele fó kréditu ba negósiu ki’ik sira iha ita-nia rai-laran atu hala’o sira ninia atividade ekonomia”, informa Ministru Fidelis, hafoin reuniaun ezekutivu iha Sala Ministériu Finansa, Aitarak-Laran, kuarta ne’e.

Sistema Garantia Kréditu hanesan polítika Governu nian atu fó apoiu ba empreza negósiu ki’ik sira, liuliu sidadaun sira ne’ebé hala’o atividade ekonomia barak liu iha setór informál hanesan kioske sira, inklui sidadaun sira ne’ebé serbisu iha agrikultura.

Governante ne’e, halo komparasaun Dekretu-Lei ida uluk, banku de’it maka bele fó kréditu ba sidadaun sira, maibé ho alterasaun ida agora permite mikro finansa mós bele fó kreditu ba sidadaun sira ho sistema garantia husi Governu.

“Ida ne’e mundansa iha ita-nia atividade  ekonómiku sira ho tablet klaru hodi fó benefísiu ba ita-nia agrikultór no negósiu ki’ik sira,” nia akresenta.

Nune’e, Governu sei kolabora hamutuk ho BCTL atu ajuda iha implementasaun ho insitutisaun finansiál sira, hafoin redasaun finál finaliza no submete ba Prezidente Repúblika hodi promulga.

Sistema ne’e hanesan mekanizmu ida atu fó apoiu ba empreza ki’ik no empreza médiu sira, nune’e Estadu fahe risku husi konsesaun kréditu ho banku komersiál sira atu fó garantia ho montante másimu porsentu 70 husi empréstimu ne’ebé hetan no kumpre rekizitu legál sira ne’ebé mak estabelese ona.

Atuál Ministru Reforma Lejizlativa no Asuntu Parlamentár ne’e realsa, objetivu prinsipál husi Sistema Garantia Kréditu mak atu fó kontribuisaun ba grupu emprezáriu sira atu sólidu no viável, ho nune’e bele favorese ba empreendedór sira ba kriasaun postu traballu no kresimentu ekonomia nasionál.

Governu Prevee Millaun $4 Iha Sistema Garantia Kréditu

Antes ne’e, Governu aloka ona orsamentu  miliaun $4 atu fó oportunidade ba negósiu ki’ik sira hodi bele rekorre ba Sistema Garantia Kréditu.

“Posibilidade Governu sei aloka tan orsamentu ba Sistema Garantia Kréditu, maibé Governu sei foku lai osan millaun $4 ne’ebé aloka ona no atu aloka tan ne’e depende mós situasaun ekonomia no kapasidade finasieru”, Ministru Fidelis salienta.

Eskema Garantia Kréditu ne’e aprova husi VI Governu Konstitusionál, ne’ebé prevee millaun U$4 liuhosi Orsamentu Jerál Estadu (OJE) 2017.

Nune’e iha jullu 2019, BCTL lansa ona Sistema Garantia Kréditu ba empreza ki’ik no média no prontu ona atu simu pedidu kandidatu ba kréditu.

Programa ne’e jere husi BCTL rasik no implementa husi instituisaun kréditu iha Timor-Leste no daudaun ne’e só Banku Nasionál Komérsiu Timor-Leste (BNCTL, sigla portugés) mak partisipa hodi fó kréditu ba kliente.

Programa Sistema Garantia Kréditu ne’e atu promove empreza ki’ik no média iha Timor-Leste hodi fasilita hodi hetan asesu finanseira.

Iha programa ne’e, risku empréstimu ba empreza ki’ik no média sei fahe entre fó empréstimu no Sistema Garantia.

Iha faze inísiu, programa Garantia Kréditu sei fó benefísiu ba empreza ki’ik no média, ho rejistu empregadu husi 6 to’o 50, na’in ema timoroan, ne’ebé opera iha área agrikultura, turizmu, indústria manufatureira no transporte.

Aleinde ne’e, kréditu só ba projetu ekonomia viável ne’ebé prienxe ba Sistema Garantia Kréditu.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here