Ministra Edukasaun, Juventude no Desportu Dulce de Jesus Soares. Imajen/António Gonçalves.

DILI, 29 abríl 2020 (TATOLI)-Governu liuhosi Ministériu Edukasaun Juventude no Desportu (MEJD) hahú tersa (28/04/2020) distribui ona livru, foos no mina ba eskola públiku sira iha Munisípiu Liquiça.

Ministra Edukasaun Juventude no Desportu, Dulce de Jesus Soares, hateten iha faze dahuluk sei halo uluk distribuisaun livru ba estudante sira iha Munisípiu haat hanesan Liquiça, Ermera, Ainaro no Manatuto.

Governante dehan aproveita distribuisaun foos, mina sona ne’ebé MEJD hetan tulun hosi Embaixada Estadu Unidu Amérika hodi distribui ba estudante iha Liquiça, governu distribui mós livru manual hodi fasilita estudante sira hodi estuda durante implementasaun estadu emerjénsia.

“Distribuisan ne’e ita hahú ona tersa horiseik iha Munisípiu Liquiça tanba hetan apoiu husi Embaixada Estadus Unidu Amérika liuhosi sira nia programa “hatutan” hodi forñese foos no mina ba eskola sira iha Munisípiu haat,” dehan Dulce ba jornalista sira hafoin enkontru Konsellu Ministru iha edifísiu Ministériu Edukasaun, kuarta ohin.

Maski Distribuisaun ne’e ekipa tékniku halo ona iha tersa (28/04/2020), maibé Nia dehan seidauk simu relatóriu hosi ekipa kona-ba livru hirak maka konsege distribui ona no sei falta hira.

”Agora daudaun livru sira ne’ebé mak iha armazén Ministériu nian ita sei hasai hotu atu halo distribuisaun ba estudante sira iha área remota, Maibé ita nia ekipa sira sei rekolla hotu dadus kompletu depois mak sei informa,” tenik governante.

Hafoin distribui ba Munisípiu haat ne’e, MEJD ninia ekipa tékniku mós sei halo distribuisaun hanesan ba munisípiu sira seluk inklui RAEOA.

Distribuisaun livru manual ne’e importante hodi tulun estudante sira atu estuda iha uma durante implementasaun EE.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here