Prezidente Repúblika, Francisco Guterres Lú Olo. Imajen/António Goncalves

DILI 28 abril 2020 (TATOLI)–Prezidente Repúblika liuhosi mensajen estensaun Estadu Emerjénsia, hato’o agradese ba Grupu Voluntáriu sira ne’ebé durante ne’e ho espíritu voluntarizmu rega ai-moruk dezinfetante ba fatin Públiku sira nu’udár kontribuisaun direta ba prevensaun surtu COVID-19.

“Ba voluntáriu sira ne’ebé hamoos no rega ai-moruk dezinfetante iha fatin públiku no fó apoiu ba kombate koletivu ne’e, liuhosi dalan ne’ebé de’it, Prezidente Repúblika hato’o obrigadu ua’in ho hako’ak boot ida,” Prezidente Repúblika hateten ba jornalista sira iha Salaun Xina Palásiu Prezidensiál Bairru Pité, Dili, tersa ne’e.

Xefe Estadu ne’e konsidera Movimentu sidadaun sira-nian, ho inisiativa rasik liuhosi dalan ne’ebé de’it, hatudu sidadania ida ne’ebé solidária no responsável.

Prezidente Repúblika mós apresia no agradese tebes maluk timoroan no belun sira ne’ebé la sura kolen, serbisu direta ka indiretamente, hanesan pesoál saúde nian, hosi defeza no seguransa ne’ebé kalan-loron halo serbisu ruma ka tau matan ba sidadaun sira-nia saúde ka seguransa iha fatin kuarentena, sentru izolamentu, Laboratóriu Nasional, iha fronteira, no tama-sai aldeia hodi hanorin ita-nia ema oinsá hasees-an hosi moras COVID-19.

Entretantu, grupu Voluntáriu oin-oin ne’ebé durante ne’e hamoos no dezinfeta fatin Públiku iha Dili laran mak hanesan iha edifisiu Públiku, edifisiu privadu balun, Igreja Sira, meskita Annur, transporte Públiku no seluk tan.

Notísia Relevante: PR Lú Olo Agradese ba Governu Austrália, Xina no Japaun

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here