Imajen Espesiál.

DILI, 28 abril 2020 (TATOLI)—Timoroan sira ne’ebé involve-aan iha Grupu Choque Club iha inisiativa rasik ajuda timoroan maluk iha situasaun Estadu Emerjénsia ba surtu COVID-19 liuhosi programa ka asaun karidade “Tulun Viziñu” hodi fahe nesesidade báziku ba família kbiit laek sira ne’ebé daudaun ne’e susar ba hahan.

Fundadór Grupu Choque Club, José de Araújo Chang hateten, razaun halo asaun karidade ida ne’e tanba konsekuensia hosi Prezidente dekreta no implementa Estadu Emerjénsia ne’e halo ekonomia rai laran afetadu.

Tanba, nia fó razaun, kondisaun moris familia balun ne’ebé mak laiha rendimentu permanente moris susar tebes, tanba ne’e mak fanu sira-nia neon tenke hodi halo asaun ruma nu’udar parte ida hosi sensitividade no responsivu ba komunidade sira ne’ebé moris terus.

José de Araújo Chang.

“Ami hanaran programa ne’e ‘Tulun Viziñu’. Ami hela rabat malu ho viziñu balu ne’ebé balu labele han loron ida dala-tolu. Balu kesi-kabun, loron ida han dala ida de’it. Balu la han tebes. Filizofia Timor nian dehan ‘Haree ó-nia vizinu hanesan o-nia maun-alin rasik tanba uainhira ó susar vizinu mak sei tulun uluk ó molok ó-nia maun-alin sira mai’ ne’e mak fanu ami atu halibur hahan hamutuk hodi fahe ba timoroan kbiit laek sira ne’e,” dehan José de Araújo Chang ba Ajénsia TATOLI liuhosi entrevista via rede sosiál, tersa ne’e.

Nia hatutan, asaun karidade ida ne’e mós hakarak fó hanorin ba juventude sira ne’ebé halibur aan iha Grupu Choque Club atu bele sensitivu ba iha nia ambiente ne’ebé nia moris bá, ho mentalidade sensitivu no responsivu be forte, atu nune’e iha futuru sira bele iha laran atu ajuda ema seluk liuliu ema kbiit laek sira.

Sasán hirak ne’e hetan hosi ne’ebé, nia hatán, sasán sira-ne’e membru ka fundadór Grupu Choque rasik mak soe hamutuk hodi nune’e bele ajuda komunidade kbiit laek sira atu bele hamnasa netik loron ida iha sira-nia moris loro-loron nian.

Imajen Espesiál.“Sasán sira ne’e kada ami membru Choque mak soe hamutuk. Membru senior sira ne’e, ema ida fós saku lima (5), supermie kaixa lima (5), mina Bimoli kaixa ida (1), Rinso kaixa ida (1) no sabaun haris doze ida (1). Membru sira ne’ebé mak kbiit laiha, sira mai ajuda serbisu de’it hodi tetu fós, falun fós no ajuda hulan sasán hirak ne’e to’o Foho Camea tutun ne’eba,” nia dehan.

Loron ohin ne’e, nia informa, liuhosi asaun “Tulun Viziñu” ne’e Grupu Choque Club fahe ona sasán nesesidade báziku ba komunidade vulneravel sira hamutuk uma-ka’in 22 ne’ebé moris no hela iha Suku Camea, Aldeia Lenuk Hun.

“Ami ohin ba fahe iha Suku Camea-Lenuk Hun, ne’e iha foho (Camea) tutun ne’ebá. Maizumenus ami la’o ain hosi Becora Au-Hun ba fatin refere bele han to’o kilometru 12. Sasán sira ne’ebé ami fahe ba komunidade sira mak fós 16kg kada família, mina litru 2 kada família, rinso no sabaun haris nian falun 2 kada família. Maibé família balun bele hetan fós to’o 20kg tanba membru família boot. Ami fó ajuda ba uma-kain ne’ebé mak ami edintifika sira laiha kbiit ka mukit duni. Ba uma-kain hotu-hotu ne’e, ami-nia kbiit la to’o. Hein katak, polítika Governu atu fó subsídiu $100 kada familia ne’e bele realiza lalais para uma-kain hotu bele hetan tulun,” nia hateten.

Nia informa, daudaun ne’e Grupu Choque Club seidauk hetan tulun ruma hosi kompañia balun maibé ho membru sira-nia inisiativa rasik mak hala’o asaun karidade ida ne’e. Maski foin hahú maibé ho membru sira hamutuk na’in 22 ne’e, sira sente orgullu tanba bele halo ona asaun karidade hodi bele ajuda komunidade kbiit laek sira.

“Tuir ami-nia planu, kuandu kompañia balu mak simpatia ho ami-nia programa ne’e hodi tulun ami, karik semana rua ba oin, ami sei halo tan asaun karidade ‘Tulun Viziñu’ ne’e,” nia dehan.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here