(Pontu de Vista hosi sidadaun baibain ida iha Timor-Leste)

Hosi: Memensio Sequeira Freitas*)

Isue kona-ba povu hamlaha sai mós informasaun viral ida iha media sosiál ohin loron, iha momentu ne’ebé Povu no Nasaun enfrenta no funu-malu hela ho inimigu-boot invizível surtu COVID-19 iha Timor-Leste. Iha kedas momentu ida ne’ebé Estadu buka proteje ninia sidadaun sira hosi ameasa ba mate iha Estadu Emerjénsia nia laran.

Tebes duni, nu’udar ser vivu ida, ita ema sente duni hamlaha iha momentu balun. Hamlaha, tanba kualkér atividade ne’ebé ita halo, gasta enerjia lubuk ida hosi ita-nia isin. Bainhira enerjia ne’e namlele no nabeen (hotu), mak ita-nia isin presiza fali enerjia foun hosi nutriente sira ne’ebé ita konsumu liuhosi alimentasaun sira.

Retórika kona-ba povu hamlaha mós levanta maka’as iha Uma Fukun Parlamentu Nasionál, hosi reprezentante povu sira ne’ebé diskute namanas pedidu renovasaun hosi Prezidente Repúblika atu Estende Estadu Emerjénsia (E3) iha segunda-feira (27 abril 2020) ida ne’e. Deputadu sira levanta maka’as kona-ba povu hamlaha no tanba ida ne’e mak tuir sira la presiza estende tan Estadu Emerjénsia. Deputadu balu hakarak husik povu la’o livre bá buka moris atu sira bele hetan netik buat ruma lori sustenta sira-nia moris.

Tebes duni ka lae, se povu la’o livre iha Estadu Emerjénsia ida ne’e nia laran no povu hotu-hotu sei la hamlaha tan? Tebes duni mós tanba Estadu Emerjénsia ne’e mak halo povu hamlaha? Antes COVID-19 mai envade mundu tomak inklui Timor-Leste no la iha Estadu Emerjénsia, povu balu la hamlaha? Husu boot atu onestu iha kestaun ida ne’e!

Iha debate ne’e, reprezentante povu balu kestiona, “Ema sé mak hamlaha no hira mak mate ona ba hamlaha?” Balu fali lamenta, “Ita ko’alia hamlaha maibé ita mak halo xumba tiha Orsamentu Jeral Estadu (OJE) 2020 liuhosi vota kontra no abstensaun mak imi kritik fali dehan povu hamlaha”. Lia haksesuk malu iha Parlamentu Nasionál iha ámbitu debate ba Estensaun Estadu Emerjénsia ne’e ita haree hanesan fali labarik ki’ik sira estraga malu sasán bainhira halimar hamutuk!

Ita la hatene! Reprezentante povu sira levanta kazu hamlaha ne’e tanba puramente hanoin duni povu ida be sira reprezenta ne’e ka sira “finjidu” halo retórika ida ne’e para povu nafatin tau simpatia ba sira? Sira ho sira mak haksesuk malu hodi fó kulpa hotu ba Governu! Karik, tanba Governu nia papél mak atu haree kestaun sosiál sira hanesan ne’e, maibé sira haluha tiha katak sira duni mak halo desizaun polítika hodi Governu ezekuta tuir programa. Obviamente diskusaun sira hanesan ne’e sai de’it hanesan “Insulta” ida ba povu iha sira-nia “patarata” nia leten.

Ativista no Eskritór, Pat Walsh, iha ninia livru “Loron ne’ebé Esperansa no Istória Ruma iha Timor-Leste (2019, p.234)” deskreve uitoan kona-ba kazu hamlaha iha tempu funu (1975-1978). Livru ne’e haktuir, “Estatístikamente, ema sivil barak loos mak mate durante funu. Barak liu mate tanba hamlaha no moras, la’ós mate tanba tiru no bomba. Tuir relatóriu Komisaun Buka Lia-Loos no Rekonsiliasaun (CAVR) hanaran “Chega!” foti konkluzaun katak “Timoroan pelumenus 100.000 mak mate tanba fome no moras ne’ebé relasiona ho hamlaha boot durante períodu funu maibé liu-liu iha dékada 1970 nia rohan”.

Se ita haree ba livru ida ne’e nia deskrisaun, ita bele nota katak kazu hamlaha ne’e la’ós buat foun maibé hola parte ona iha timoroan sira-nia istória bainhira luta ba ukun rasik aan. Biar ema barak mate tanba hamlaha, hirak ne’ebé moris kontinua luta hodi konkista vitória boot ukun rasik aan. No, ohin ita bele sai Nasaun Soberanu ida, hodi distintu reprezentante povu nian diskute nafatin kona-ba povu nia hamlaha.

Pergunta mak ne’e: “Tanbasá povu hamlaha nafatin enkuantu ita gasta ona billiaun barbarak durante dékada ida resin nia laran?” Fila fali ba distintu sira atu buka responde tanbasá mak hamlaha ne’e akontese nafatin no beibeik iha imi-nia matan? Tuir loloos, kazu hamlaha labele mosu ona bainhira Ita-Boot sira halo polítika ho sinseru no luta duni ba povu nia moris di’ak!

Pergunta seluk ne’ebé relasiona ho kazu hamlaha mak ida ne’e: Timor-Leste iha seguransa alimentár atu rezolve problema hamlaha ka lae? Planu Estratéjiku Dezenvolvimentu Nasionál (PEDN) 2011-2030 hatuur mós seguransa alimentar no nutrisionál nu’udar pilár importante ba dezenvolvimentu ita-nia-rain nian.

“A segurança alimentar e nutricional está na base do desenvolvimento nacional. O Plano Estratégico de Desenvolvimento 2011-2030 (PEDN) reconhece que a verdadeira riqueza de uma nação está na força da sua população. Maximizar a saúde, educação e a qualidade de vida em geral da população timorense é fundamental para construir uma nação justa e progressiva”.

Polítika ida ne’e nia kontribuisaun to’o iha ne’ebé ona atu kombate kazu hamlaha? Infelizmente, ohin ita diskute nafatin povu nia hamlaha enkuantu povu balu “sobak rai” duni iha sira-nia hamlaha laran.

Iha Governu dahaat nia tempu mós Ministériu Agrikultura no Peska lansa polítika fahe tratór ba agrikultór sira. Polítika ida ne’e nia finalidade mak atu ajuda agrikultór sira hodi haree ba produsaun ai-han ne’ebé sustentável, tanba durante ne’e agrikultór sira uza sistema tradisionál, liman ka ai-su’ak de’it.

Aleinde atu garante seguransa alimentar, polítika ida ne’e liga mós ba kreximentu ekonómiku ba agrikultór sira. Polítika sosa tratór (medida médiu no boot) no hand tractor (HT) iha tinan hirak nia laran ne’e gasta osan hamutuk millaun $30.439.920 (se ha’u la sala temi).

Polítika ida ne’e nia retornu mak saida ona? Foos tonelada hira ona mak kontribui ona hosi polítika ida ne’e? Tanbasá ita la iha nafatin seguransa alimentár hodi bele ajuda ba povu ne’ebé halerik tanba hamlaha? Infelizmente, ita sei depende nafatin ba importasaun foos hosi rai li’ur, enkuantu tratór hirak ne’e agora daudaun barak mak abandonadu hela iha fatin-fatin—husik aat no dodok folin laek.

Saida loos mak sala hosi polítika ida ne’e? Polítika mak ladún di’ak? Ka implementasaun mak la la’o? Ou karik tanba laiha kontinuasaun? Ka karik tanba fiskalizasaun mak la la’o? Distintu deputadu sira mak tenke buka atu responde pergunta sira ne’e. Ha’u hanoin, duké Ita-Boot sira levanta kazu ami-povu sira-nia hamlaha ha uma fukun Parlamentu Nasionál, di’ak liu Ita-Boot sira buka atu haree situasaun ida-ne’e ho sériu liuhosi mellora desizaun polítika ne’ebé distintu sira tenke foti bainhira aprova Orsamentu Jerál Estadu. La’ós naran vota tanba orientasaun polítika hosi partidu ne’ebé imi adere ba!

Fila fali ba pergunta “sa’ida mak rezulta hamlaha”? Ita iha polítika prioridade ba dezenvolvimentu. Ida mak agrikultura aleinde edukasaun no saúde. Ministru barak mak troka malu ona hodi okupa pasta ida ne’e ho programa funan-funan, renda-renda. Tinan 18 ona ita investe iha área agrikultura ho osan boot, ita nafatin labele rezolve kazu hamlaha iha Timor-Leste. La hatene karik tanba polítika mak seidauk di’ak ou ita la sériu iha investimentu ida ne’e?

Ukun na’in sira ba preukupa fali polítika nível altu, envezde haree liu ba kestaun téknika sira ne’ebé bele responde lalais ba ezijénsia komún tuir ita-nia realidade. Alternativa ida ke hakerek na’in bele aprezenta mak ida ne’e: Movimenta no envolve to’ok organizasaun Conselho Popular Demokratika Repubúblika Timor-Leste (CPD-RDTL) ka Uniaun Nasionál Juventude Maubere (UNIJMA) nia emar iha programa agrikultura! Subsidia sira ho saláriu, fasilita sira hela iha “rezidénsia agríkola” ho hahan sufisiente no nutritivu no mós transporte adekuadu no apropriadu, halo oráriu servisu ida fiksu no monitoriza sira-nia atividade. Ha’u fiar katak bainhira Governu hakarak halo ida ne’e mak ita sei rezolve problema hamlaha no polítika Seguransa Alimentar bele atinje.

Tanba sá? Tanba tinan ida sira bele halo kolleta dala rua (mínimu) no tinan 5 nia laran de’it ita-nia armazen sira bele nakonu ona ho hare-kulit ne’ebé bele nakfilak ba foos! Sira-nia serbisu iha Welaluhu Same tinan hirak liu ba no mós iha fatin seluk, fó prova katak sira bele halo serbisu ida ho rezultadu.

Aleinde natar, sira mós bele halo to’os hodi kuda batar, fore keli, fore mungu no produsaun agríkula seluk. Dala ida tan, basta subsidia sira no fasilita sira ho nesesidade serbisu nian! Tratór sira be abandona hela ne’e, sira bele utiliza hodi hasa’e di’ak liután sira-nia produsaun. Produsaun ida ba Estadu tanba sira sai ona hanesan ajente Estadu nian!

Afinál, ita diskute hela kona-ba hamlaha maibé ita la konsege deskobre tanbasá mak ema hamlaha! Fatór seluk ida mós mak povu agrikultór sira kuaze abandona ona sira-nia to’os no natar. Sira depende liu ona ba subsidiu hosi Governu. Nune’e, sira hili liu atu hola de’it iha merkadu, kióske, loja ka supermerkadu sira duké sira tenke ba halo to’os no natar.

Mentalidade foun ida ne’e halo ema sai baruk no kuandu ezisténsia nesesidade bázika sira hanesan foos menus ka laiha ona iha merkadu, ema komesa hakilar hamlaha. Se ita serbisu nafatin hanesan agrikultór hodi halo to’os no natar, biar ita simu subsidiu hosi Governu, mak ha’u hanoin mós kazu hamlaha sei labele mosu iha Timor-Leste ida ho maioria nia abitante moris nu’udar agrikultór!

Husu boot, ho levantementu kazu hamlaha iha Uma Fukun Parlamentu Nasionál foin lalais ne’e, ba oin, Estadu tenke iha ona medida preventiva adekuada ida atu prevene kazu refere mezmu kazu Coronavirus (COVID-19) la ejiste ona iha mundu loron ruma. Husu boot mós atu distintu deputadu sira la levanta de’it kazu hamlaha iha tempu diskusaun sira ba estende Estadu Emerjénsia, Ita-Boot sira sempre tuun ba baze atu halo fiskalizasaun (osan ba atividade fiskalizasaun garantidu), identifika mós povu hira mak hamlaha, nune’e bainhira Ita-Boot sira levanta karik, aprezenta mós ho dadus apropriadu!

Se lae, ami sira povu baibain ne’e bele “cap” [tau karimbu iha imi-nia reen-toos bá] katak Ita-Boot sira (reprezentante povu iha uma fukun parlamentu nasionál) halo konspirasaun polítika iha momentu sira Estadu presiza imi-nia desizaun di’ak atu salva povu hosi pandemia aat [COVID-19] ida ne’ebé oho ona ema rihun ba rihun iha mundu.

*) Hakerek na’in nu’udar profesór ida iha Escola Sekundária Públika Olocassa Ossú (Viqueque) no hela iha Ossú.

HAKEREK NO HATÁN

Please enter your comment!
Please enter your name here