Koordenadór Jerál Sekretariadu Konsellu Fundu COVID-19, Januário da Gama. Imajen Tatoli/Egas Cristovão

DILI, 28 abríl 2020 (TATOLI) – Orsamentu hamutuk millaun $150 ne’ebé Parlamentu Nasionál (PN) aprova hodi responde halo prevensaun no metigasaun surtu COVID-19 iha Timor-Leste aloka ba ministériu no instituisaun hamutuk 13.

Ministériu Finansa (MF) liuhosi reuniaun entre Sekretariadu Téknika Konsellu Jestaun Fundu COVID-19, halo ona notifikasaun ba ministériu no inistituisaun implementadór sira hodi hahú ezekuta no implementa Fundu COVID-19.

Tuir Koordenadór Jerál Sekretariadu Tékniku Konsellu Fundu COVID-19, Januário da Gama, notifikasaun ne’e hodi fó disponibilidade fundu no sistema hodi instituisaun relevante sira bele ezekuta ona fundu.

“Baibain Ministériu Finansa fahe ba pakote orsamentu hafoin aprovadu, halo notifikasaun ba ministériu sira katak fundu ne’e prontu ona no enkuadra ona iha sistema entaun ministériu no instituisaun sira bele ezekuta ona orsamentu ne’e. Notifikasaun ba liña ministériu no instituisaun implementadór sira katak fundu ho ninia sistema finanseiru prontu ona hahú ohin ba oin bele halo ona halo ezekusaun”, informa Januário da Gama hafoin reuniaun iha Salaun Ministériu Finansa, Aitarak-Laran, tersa ne’e.

Atuál Diretór Jerál Planeamentu no Orsamentu MF ne’e esklarese, husi fundu ne’ebé maka disponível ona iha sistema atu ezekuta ho aprovasaun iha PN hamutuk millaun $150, osan ne’e hafoin ministériu no instituisaun implementadór sira halo sira ninia planu atividade no submete ba iha Sentru Intergradu Jestaun Krize (CIGC, sigla portugés), konsege formula hodi implementa liuhosi programa importante tolu.

Programa dahuluk maka prevensaun no metigasaun COVID-19 ho ninia montante orsamentu hamutuk millaun $125,9, husi verba ne’e sei finansia sub-programa hamutuk 10.

Progaram daruak mak aumenta produsaun no produtividade ho ninia alokasaun hamutuk millaun $4.9, no programa datoluk maka asesu produtu alimentár iha alimentasaun servisu ho ninia alokasaun orsamentu hamutuk millaun $19,1.

“Husi programa ida ne’e, atu halo akizasaun foos hodi halo intervensaun ba merkadu no halo apoiu umanitária karik husi efeitu husi moras Coronavírus ne’e maka’as entaun komunidade presiza atu hetan tulun akizasaun foos”, nia akresenta.

Alokasaun orsamentu ne’ebé aloka ministériu no instituisaun hamutuk 13, alokasaun ba Parlamentu rasik tuir lei ne’ebé aprova iha PN iha kabimentu hamutuk $500.000.

Aleinde ne’e, aloka ba iha Gabinete Primeiru-Ministru hamutuk millaun $1,6, Sekretáriu Estadu Komunikasaun Sosiál hamutuk $207.000, Ministériu Agrikultura no Peska millaun $4,9, Ministériu Negósiu Estranjeiru no Kooperasaun millaun $2,4, Ministériu Finansa $900.000, Ministériu Saúde millaun $52,4, Ministériu Solidariedade Sosiál no Inkluzaun millaun $15.

Enkuantu, Ministériu Turizmu, Komérsiu no Industria millaun $6, FALINTIL-Forsa Defeza Timor-Leste (F-FDTL) millaun $12,5, Polísia Nasionál Timor-Leste (PNTL) $670.000, Centru Logistika Nasionál (CLN, sigla portugés) hamutuk millaun $19,1, CIGC millaun $34,5 hanesan fundu rezerva.

Nia salienta, husi alokasaun sira ba ministériu sira kontribui hotu programa no atividade ba prevensaun no metigasaun COVID-19.

“Husi notifikasaun ne’ebé ami halo ho ninia padraun prosedimentu operasionál ne’ebé mak ami distribui tiha ona, ninia prosesu sira tuir mai atu ministériu no instituisaun sira tenke halo maka prepara sira nia planu ezekusaun ka planu despeza no planu atividade husi programa no sub-programa ne’ebé maka integra ona iha sistema. Ida-ne’e atu asegura katak ezekusaun husi liña ministériu no instituisaun sira tenke konsistente nafatin ho planu orijinál ne’ebé hetan ona aprovasaun husi komisaun interministeriál no husi Konsellu Kestaun Fundu COVID-19”, nia dehan.

Ministériu no Instituisaun Sira Sei Loke Konta Bankária

Januário adianta, MF liuhosi Sekretariadu Tékniku sei koordena ho ministériu no instituisaun sira atubele loke konta bankária hodi atividade hira ne’ebé tenke ezekuta ho forma adiantamentu, ne’ebé tenke loke konta bankária nune’e MF transfere osan adiantamentu ne’e diretamente ba konta bankária operasionál ministériu no instituisaun ida-idak ninian.

“Tenke evita osan cash, tanba dala barak iha ámbitu prátika normál sira mai foti check hafoin ba foti osan iha banku. Maibé iha situasaun COVID-19 ninian MF sei transfere de’it osan adiantamentu diretamente ba iha konta bankária operasionál ministériu no instituisaun ida-idak no sira nia funsionáriu finansa maka foti osan hodi finansia atividade ne’ebé ho forma adiantamentu”, Januário salienta.

Entretantu husi planu no atividade despeza ne’ebé ministériu no instituisaun sira prepara, MF sei fó tempu to’o kuarta (29/04) antes oras serbisu ramata tenke aprezenta filafali mai iha Konsellu Jestaun Fundu, nune’e Sekretariadu Tekniku halo verifikasaun ba pedidu sira hodi bele rekomenda no aprova.

Lista husi ministériu sira ne’e enkuadra tiha ona iha sistema, maibé iha implementasaun bele la ezekuta hotu tanba depende ba nesesidade husi ministériu sira, karik proposta ruma mak la tama rekezitu maka Sekretariadu Tékniku sei rekomenda ba Konsellu Jestaun hodi bele halo aprovasaun hodi inisia uluk nesesidade sira ne’ebé tama ba prioridade.

Konsellu Jestaun sei halo aprovasaun iha loron 1 maiu 2020, iha períodu fim-de-semana iha loron 2 to’o 3 maiu, Konsellu Ministru aprova Sekretariadu Tékniku liuhosi Diresaun Jerál Tezouru halo kriasaun sistema ba CPV atubele halo pagamentu hirak ne’ebé adiantamentu transfere ba konta bankária kada ministériu.

“Hirak ne’ebé liuhosi prosesu aprovizionamentu sei delega ba ministériu no instituisaun sira atubele halo to’o iha faze pedidu pagamentu mak sira haruka mai iha Ministériu Finansa liuhosi Sekretariadu Tékniku atuhalo pagamentu”, nia akresenta.

Prosesu ezekusaun hahú ona no sistema loke ona, tanba ne’e pagamentu balun bele halo ona hahú ohin, sira ne’ebé mak presiza kria CPV no presiza halo aprovizionamentu komesa loron 4 maiu bele efetiva ona ninia ezekusaun.

Januariu relata, Padraun Prosedimentu Operasionál importante tanba fundu ne’e ninia implementasaun ho karater transversál, tanba ne’e fundu ho situasaun tenke responde nesesidade iha situasaun emerjénsia husi efeitu sira ne’ebé prepara husi COVID-19 ne’e rasik.

Nune’e mós, iha koordenasaun no kooperasaun entre liña ministériu no instituisaun sira ne’ebé iha ligasaun ho implementasaun Fundu COVID-19 ninian, tanba ne’e ministériu liuhosi Sekretariadu Tékniku haree katak presiza iha ezekusaun no implementasaun ida rigorozu ba iha fundu ne’e rasik.

“Nune’e padraun prosedimentu operasionál ne’e hanesan giaun tékniku ida ba sira, para sira bele kuidadu iha ezekusaun orsamentu iha fundu COVID-19 ninian”, nia realsa.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here