Materiál doasaun kombate COVID-19 husi Governu Xina to’o iha Aeroportu Comoro ho Aviaun Citilink, tersa (28/04). Imajen/António Gonçalves

DILI, 28 abríl 2020 (TATOLI) – Ministru Saúde interinu, Bonifácio Maucoli dos Reis, husu ba públiku labele kestiona materiál doasaun husi Governu Repúblika Populár Xina, tanba Ministériu Saúde (MS) rasik bele garante kualidade materiál hirak ne’e.

Materiál ne’ebé Governu Xina entrega ba Governu Timor-Leste maka hanesan 42.000 máskara, 40.000 máskara KN95, 4.400 aventál ba protesaun, 4.440 vizeira, 4.400 kapa ba sapatu, 5.000 luvas ba médiku sira, 80 termometru no 90 ventiladór portable.

“Ita akompaña iha mídia sosiál sira kona-ba ekipamentu husi Governu no Povu Xina ne’e, Ministériu Saúde bele garante katak sasán ne’e ho kualidade no husu ba públiku atu labele kestiona tanba ida-ne’e hanesan doasaun ne’ebé Governu Xina kontribui mai Povu Timor-Leste atubele uza hodi proteje ba pandemia COVID-19”, dehan Ministru Bonifácio iha seremónia entrega materiál doasaun husi Governu Xina, iha Aeroportu Internasionál Prezidente Nicolau Lobato, Comoro, tersa ne’e.

Tuir governante ne’e, kona-ba kualidade materiál antes atu utiliza sei liuhosi teste hodi sente katak iha duni kualidade atu proteje ba ema ne’ebé uza.

“Maibé ita uza maka tenke hatene oinsá atu uza máskara no materiál seluk, ne’e depende ba ema ida-idak ne’ebé hetan treinamentu ba ekipamentu sira ne’e”, nia akresenta.

Governate ne’e realsa, materiál doasaun ne’ebé maka Governu Xina providénsia mai Timor-Leste, sai responsável tomak husi Governu Xina, husi kustu aviaun komunidade xinez iha Timor-Leste maka responsabliza hodi transporta materiál protesaun COVID-19 to’o mai Timor-Leste.

Nia haktuir, molok materiál hirak ne’e tun iha Aeroportu Comoro, iha ekipa ne’ebé halo dizinfekta ba materiál.

“Ha’u hanoin ita labele lakon fiar ba sasán sira ne’e tanba konserteza laiha nasaun ida maka iha hanoin a’at atu mai prejudika fali nasaun ida seluk, tanba sira nian reprezentante nu’udar Embaixadór mós iha ne’e sei kolabora ho laran oinsá atu suporta ita-nia sidadaun sira”, nia salienta.

Ministru Bonifácio subliña, Governu Timor-Leste iha métodu rasik oinsá atu garante kualidade sasán.

“La’ós ita atu jeneraliza katak sasán ne’e laiha kualidade. Ministériu Saúde nia responsabilidade  bainhira maka atu destribui materiál sira ne’e konserteza la’o nafatin tenke tuir buat ne’ebé  maka Organizasaun Mudiál Saúde ho Ministériu Saúde aplika, liuliu oinsá atu asegura nafatin kualidade atu nune’e ita bele preteje-an”, nia adianta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here