Ministra Finansa ein ezersísiu, Sara Lobo Brites. Imajen Tatoli/Egas Cristovão

DILI, 28 abríl 2020 (TATOLI) – Ministra Finansa ein ezersísiu, Sara Lobo Brites, konvoka reuniaun ho Ministru Administrasaun Estatál interinu, Abílio José Caetano ho Ministra Solidariedade Sosiál no Inkluzaun, Armanda Berta dos Santos, hodi deskute kona-ba preparasaun pagamentu subsídiu $100 ba kada uma-kain.

Durante diskusaun, Ministru Abílio aprezenta katak daudaun ne’e halo ona levantamentu dadus ba uma-kain sira ne’ebé atinje ona porsentu 70.

“Ami na’in-tolu diskute preparativu halo pagamentu ba subsídiu $100 ba uma-kain sira, ne’ebé maka Konsellu Ministru deside tiha ona. Dekretu-Lei ne’e Konsellu Ministru aprova tiha ona no hein promulgasaun husi Prezidente Repúblika”, informa Sara Lobo iha Salaun Ministériu Finansa, Aitarak-Laran, tersa ne’e.

Tuir Ministra, enkuantu hein promulgasaun, Ministériu Administrasaun Estatál (MAE) hamutuk ho Ministériu Solidaridade Sosiál no Inkluzaun (MSSI) sei prepara mekanizmu pagamentu no levantamentu dadus.

Tuir diskusaun, bainhira MAE ramata rekolla dadus, sei entrega ba MSSI hodi halo kruzamentu ba dadus no verifika fali verasidade dadus, hafoin hatama proposta ba Konsellu Jestaun Fundu COVID-19.

Maski nune’e, MAE no MSSI planea ona semana oin proposta sei hatama proposta hodi hetan aprovasaun.

“Ezekusaun ne’e lalais kuandu dadus ne’e kompletu ona, tanba tuir planu MAE no MSSI hakarak pagamentu ne’e halo simultániamente iha territóriu tomak husi nível aldeia, entaun presiza mobiliza rekursu no hetan seguransa no apoiu husi ministériu sira seluk atubele ajuda liuliu funsionáriu husi MSSI nian rasik. Tanba ne’e Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL) no ekipa husi MAE nian presiza mobiliza ona mak halo oráriu ba pagamentu”, Sara Lobo adianta.

Nia hatutan: “Tanba ne’e mai iha diskusaun husu atu determina nia data tanba hakarak atu aselera ninia prosesu”.

Entretantu, orsamentu ne’ebé aloka iha MSSI husi Fundu COVID-19 hamutuk millaun $15, ne’ebé inklui ona subsídiu $100 kada uma-kain.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here