Imajen Tatoli/Evaristo Soares Martins.

DILI, 28 abríl 2020 (TATOLI)—Bankada Parlamentár Kmanek Haburas Unidade Nasionál Timor Oan (KHUNTO) liuhosi deputadu na’in-lima iha parlamentu vota a-favór ba pedidu estensaun Estadu Emerjénsia (EE) tanba kuadru KHUNTO nian mós envolve iha VIII Governu Konstitusionál.

Deputadu KHUNTO, Luis Roberto hateten, KHUNTO tenke apoiu para governante hirak ne’e bele halo serbisu ho di’ak. Se, nia dehan, deputadu/a KHUNTO na’in lima mak la apoia ne’e hatudu katak politika la’o la loos ona.

“Pozisaun KHUNTO nian ha’u hakarak ko’alia ba públiku katak VIII Governu ne’e partidu KHUNTO nia ema iha laran inklui ami-nia Prezidente Partidu (Armanda Berta dos Santos). Ami tenke apoiu hodi sira halo serbisu ho di’ak tanba parlamentu hahoris ona entaun ami mak sira-nia lian. Kuandu ami na’in-lima la apoia VIII Governu entaun polítika la loos ona. Ami KHUNTO iha na’in sia ka 10 iha Governu laran,” Deputadu KHUNTO, Luis Roberto, ko’alia iha resintu Parlamentu Nasionál, tersa ne’e.

Nia afirma, loloos ne’e deputadu sira hosi CNRT tenke apoia estensaun Estadu Emerjénsia ne’e tanba CNRT nia ema mós iha laran hotu.

“Tuir polítika loloos ne’e CNRT mós tenke apoiu ba VIII Governu ida-ne’e tanba CNRT nia ema barak iha laran,” Deputadu Luis Roberto fó hanoin.

Nia husu partidu polítiku hotu-hotu tenke tau sees tiha polítiku, hotu-hotu tenke apoia VIII Governu hodi halo prevensaun ba COVID-19 ne’ebé KHUNTO hatudu ona liuhosi plenária horisehik.

Nia dehan, kona-ba koligasaun ne’ebé lidera hosi CNRT ne’e formál ida ka dalan ida, ida-ne’e ninia desizaun sei hein Prezidente Repúblika, Francisco Guterres ‘Lú Olo’.

Luis Roberto argumenta, KHUNTO apoia estensaun Estadu Emerjénsia tanba realidade hatudu katak populasaun iha rai seluk mate hanesan animál entaun Timor-Leste tenke iha prevensaun liuhosi estadu emerjénsia ne’e.

Tuir observasaun oras ne’e iha Parlamentu Nasionál, parte bankada parlamentár CNRT sei halo hela reuniaun iha sala bankada CNRT nian.

Notísia Relevante: FRETILIN-KHUNTO Apoia Pedidu Estensaun EE, CNRT Sei Vota ho Konsiénsia

Jornalista : Evaristo Soares Martins

Editór     : Cancio Ximenes

HAKEREK NO HATÁN

Please enter your comment!
Please enter your name here