Portavóz CIGC, Odete Viegas. Imajen/Egas Cristovão

DILI, 28 abríl 2020 (TATOLI) – Portavóz Sentru Integradu Jestaun Krize (CIGC, sigla protugés) no Koordenadora Ofisiál Ligasaun Forsa Tarefa, Odete Viegas, hateten kazu konfirmadu ba COVID-19 sei mantein 24 no na’in-neen mak rekupera ona maibé totál ema ne’ebé halo teste maka aumenta.

“Númeru teste sa’e husi 480 ba 597, ne’ebé inklui mós kazu iha Liquiça, no ba totál rezultadu laboratóriu pendente husi na’in-89 sa’e ba 206, enkuantu totál komulativu ba kazu konfirmadu mantein 24, kazu foun laiha, rezultadu laboratóriu negativu mantein nafatin 367 no kazu rekupera na’in-neen”, informa Portavóz CIGC liuhosi konferénsia imprensa iha Sentru Mídia, Sentru Konvensaun Dili (CCD, sigla portugés), tersa ne’e.

Nia akresenta, daudaun ne’e profisionál saúde ne’ebé iha kuarentea sira hamutuk na’in-40.

Enkuantu totál ema iha kuarentena ka konfinamentu obrigatóriu hamutuk 411, ne’ebé na’in-363 maka iha konfinamentu obrigatóriu,  iha Dili hamutuk 249 no munisípiu na’in-69, no auto-kuarentena 48, kompostu husi ne’ebé auto kuarentena iha Dili na’in-ualu no munisípiu seluk na’in-40.

Entretantu, timor-oan sira ne’ebé iha pasa ona kuarentena loron 14 hamutuk 1.702 no husi totál ne’e na’in-1.357 maka hela iha Dili no na’in-345 maka hela iha munisípiu.

“Kazu konfirmadu no kazu provável ne’ebé agora Timor-Leste iha, sei nafatin restritu ba grupu ka klaste hitu, maibé hanesan ita hotu rona no hatene katak ho Grasa Maromak nian durante pandemia COVID-19 to’o agora seidauk iha ema mate iha Timor-Leste”, nia realsa.

Ho nune’e, Koordenadór Forsa Tarefa ne’e apela  ba populasuan tomak atu tuir nafatin medida prevensaun ne’ebé Governu implementa ona tanba CIGC kontinua investiga no responde ba surtu.

“Ita tenki kontinua investiga no responde ba surtu seluk no emerjénsia hanesan Dengue maske ita mós nafatin foka ita hotu nia enerjia no rekursu hodi responde ba COVID-19”, nia adianta.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here