Jacinto Rigoberto. Imajen Doc. Tatoli.

DILI, 28 abríl 2020 (TATOLI)—Sekretáriu Jerál Partidu CNRT Ein-Ezersísiu atuál Adjuntu Sekretáriu CNRT, Jacinto Rigoberto hateten, koligasaun Aliansa Maioria Parlamentár (AMP) sei metin tanba asina ona akta koligasaun.

“Hakarak atu informa katak até a data seidauk iha desizaun formál ruma sobre koligasaun nia ezisténsia. Ne’eduni hosi parte CNRT sei mantein no fiar katak koligasaun ida-ne’e sei mantein metin, tanba ne’e ami iha ámbitu AMP (Aliansa Maioria Parlamentár) tanba iha ona akordu no asinatura, nia submisaun ba hotu ona iha Prezidente Repúblika,” Sekretáriu Jerál Partidu CNRT Ein-Ezersísiu atuál Adjuntu Sekretáriu CNRT, Jacinto Rigoberto, informa liuhosi konferénsia imprensa, iha sala bankada CNRT, iha Parlamentu Nasionál, tersa ne’e.

Jacinto Rigoberto fó-sai katak, AMP ne’ebé lidera hosi CNRT sei kontinua hein desizaun Prezidente Repúblika, Francisco Guterres ‘Lú Olo’.

“Ami sei hein nafatin tanba molok AMP ne’e ida-idak halo nia konferénsia hodi deside. KHUNTO mós halo nia kongresu hodi deside hamutuk ho partidu lima seluk,” nia dehan.

Nia afrima, sé partidu balu ne’ebé envolve iha AMP atu hasees-an, tenke halo asaun ne’ebé hanesan konferénsia ka kongresu.

Hatán kona-ba Partidu KHUNTO kontinua ho VIII Governu Konstuitusionál tanba horisehik deside apoia estensaun ba estadu emerjénsia, nia hatán, ida-ne’e hanesan informasaun de’it.

Partidu neen (6) kompostu hosi CNRT, KHUNTO, PD, UDT, FM no PUDD asina akta koligasaun iha loron sábadu (22/2/2020), iha sede CNRT, Bairro dos Grilhos, Dili.

Akta ne’e asina hosi Prezidente CNRT, Kay Rala Xanana Gusmão, Prezidente PD, Mariano Assanami Sabino, Prezidente KHUNTO, Armanda Berta, dos Santos, Prezidente En-Ezersísiu UDT, Rodolfo Aparício Guterres, Prezidente En-Ezersísiu Frente-Mudansa (FM), Egídio de Jesus no Prezidente PUDD, António de Sá Benevides.

Notísia Relevante: KHUNTO Apoia Estensaun EE Tanba Envolve iha VIII Governu Konstitusionál

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here