Logotipu TDD. Imajen/Egas Cristóvão

DILI, 28 abríl 2020 (TATOLI) – Tribunál Distritál Dili (TDD) iha primeiru periodu implementasaun estadu emerjénsia hosi loron 26 marsu to’o 27 abríl 2020, atende  ona kazu ho karákter urjente ka foun hamutuk 15.

Notísia Relevante : Durante EE Tribunál Konsidera De’it Julgamentu Ba Kazu Importante

Juis Administradór Tribunal Distritál Dili (TDD), Afonso Carmona. Imajen/Domingos Piedade Imajen/Domingos Piedade

Juis Administradór TDD, Afonso Carmona, ohin, informa, hosi númeru ne’e kompostu hosi prosesu sivíl ka embargu prosesu kautela rua (2) relasiona ho problema rai  no ba kazu krime ba prosesu sumáriu lima (5) no primeiru interrogatóriu ualu (8).

Juis Administradór TDD, Afonso Carmona, ba Ajénsia Tatoli iha nia knar fatin, TDD, hateten, total kazu ba prosesu julgamentu kontinuasaun ne’ebé tribunál hasai ona notifikasaun, maibé tama ho estadu emerjénsia labele realiza.

Nia dehan, mezmu ho situasaun ne’e tribunál kontinua sei jere oráriu no aselera julgamentu kazu sira ne’e bainhira estadu deklara Timor-Leste livre ona hosi propagasaun Coronavirus ka COVID-19.

Ho estensaun EE ba daruak nian, Juis Afonso Carmona esplika, automatikamente TDD kontinua suspende nia atividade julgamentu normal, maibé bele atende kazu urjente sira hanesan primeiru interrogatóriu, prosesu sumáriu, embargu no prosesu kautela. Nune’e, evita ema-nia direitu labele lakon.

Iha  ámbitu estadu emerjénsia TDD mós aplika regra medida prevensaun sira hanesan mantén distánsia fíziku, uza máskara, prepara bee ho sabaun fase-liman.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here