: Portavós CIGC, Odete da Silva Viegas, akompaña hosi Adjuntu Prezidente Autoridade Munisípiu Dili, José Smith, sensibiliza prosedimentu sira kona-ba protesaun hosi propagasaun surtu Coronavirus ba negosiante sira iha Merkadu Manleuana, Dili, tersa (28/04/2020). Imajen/Eugénio Pereira

DILI, 28 abríl 2020 (TATOLI)-Governu liuhosi Ministériu Saúde no Ekipa Sentru Integradu Jestaun Krize (CIGC, sigla portugés) ho Autoridade Munisípiu Dili, ohin, tuun ba halo sensibilizasaun ba negosiante sira iha Merkadu Taibesi ho Merkadu Manleuana kona-ba distansiamentu fízika atu hadook-an  hosi propagasaun Coronavirus ka COVID-19 no mós moras denge.

Notísia Relevante : Kazu Konfirmadu COVID-19 Mantein 24, Totál Teste Sa’e ba 597

Sensibilizasaun ne’e hala’o diretamente hosi Portavós CIGC, Odete da Silva Viegas, akompaña  mós hosi Adjuntu Prezidente Autoridade Munisípiu Dili, José Smith, Xefe Departamentu Jestaun Merkadu, Berta Santa Gonçalves Viera
no ekipa.

Adjuntu Prezidente Autoridade Munisípiu Dili, José Smith no Xefe Departamentu Jestaun Merkadu, Berta Santa Gonçalves Viera tun direita ba merkadu Manleuna hodi sosializa no regula atividade negósiu kontrola distánsia sosiál. Imajen/Eugénio Pereira

Adjuntu Prezidente Autoridade Munisipiu Dili, José Smith, orienta ekipa jestaun merkadu atu halo kontrolu maka’as ba negosiante sira inklui kompradór sira iha merkadu rua nee atu kumpre orientasaun MS ho OMS (Organizasaun Mundiál Saúde) kona-ba oinsá uza máskara, fase-liman ho sabaun beibeik no kumpre distansiamentu fízika.

José Smith husu atu kualkér negosiante inklui kompradór  sira ba merkadu evita lori labarik ki’ik sira, tanba daudaun ne’e kondisaun iha merkadu liu-liu fatin sira ne’ebé fa’an ropa obralan barak maka kria susuk tanba ropa tara de’it no fo’er barak sei soe arbiru.

Durante sensibilizasaun ne’e, José  Smith orienta ekipa Jestaun Merkadu atu fó xamada ba negosiante sira ne’ebé fa’an ropa no sasán la kumpre regra distánsia sosiál no fíziku inklui soe fo’er arbiru iha merkadu laran tenke fó sansaun taka sira nia atividade negósiu.

“Ami apela ba negosiante sira atu kumpre regra hotu liu-liu kontrola distánsia sosiál, uza máskara, fase-liman no limpeza beibeik atu prevene propagasaun COVID-19 inklui moras dengue. Ba se maka la kumpre regra no kontinua soe fo’er arbiru, ami sei taka imi nia atividade,” afirma José Smith.

Nia dehan, agora daudaun iha Timor-Leste sofre COVID-19 no dengue rejista númeru aas tebes, tanba ne’e ekipa sei kontinua kontrola nafatin negosiante sira hodi kumpre regra.

Iha fatin hanesan, portavós CIGC, Odete da Silva Viegas, apela ba negosiante sira tenke kumpre regra ne’ebé fó sai ona hodi próteze-an hosi propagasaun peste letál ne’e.

Odete dehan, daudaun ne’e COVID-19 rejista pasiente hamutuk na’in-24, ema na’in-neen (6) rekupera ona no falta Timoroan balun sei hela iha fatin kuarentena ne’ebé ekipa médiku halo ona teste ba sira-nia raan.

“Surtu Coronavirus ka COVID-19 sai ameasa ba mundu inklui sai preokupasaun ba ita oinsá maka atu hamutuk ho estadu luta kontra moras ne’e,” afirma Odete Viegas.

CIGC liuhosi portavós Odete Viegas apela ba negosiante sira tenke badinas fase-liman beibeik la’ós atu prevene-an husi COVID-19 de’it, maibé prevene-an mós hosi moras hotu-hotu hanesan denge no seluk tan.

Tuir observasaun Ajénsia Tatoli durante halo sensibilizasaun ne’e, negosiante sira iha Merkadu Taibesi ho Manleuna mós komesa kumpre ona regra uza máskara no luvas, inklui fatin negósiu oin sira tau bee-moos no sabaun no fa’an sasán ho distánsia metru ida ba malu.

Jornalista   : Eugénio Pereira

Editór         : Francisco Simões

HAKEREK NO HATÁN

Please enter your comment!
Please enter your name here