Ministeriu Saude re-integra estudante na'in hitu iha otel Farol no Luxury Dili ba Familia. Imajen:Felicidade Ximenes

DILI, 28 abríl 2020 (TATOLI)-Governu liuhosi Ministériu Saúde iha tersa (28/04/2020) re-integra tan Timoroan na’in hitu ba sira-nia família hafoin kumpre kuarentena obrigatóriu iha Otél Faról ho Luxury Hudi-Laran Dili.

Abitante na’in hitu ne’e kompostu hosi feto na’in rua no mane na’in lima, Ministériu Administrasaun Estatál maka fasilita transporte hodi tula sidadaun na’in ida bá Munisípiu Baucau, ida bá Bobonaro no Na’in lima seluk iha Dili.

Diretór Apoiu Jurídiku Kontensioza Ministériu Saúde,Belarmino da silva Pereira, ba jornalista sira hateten sidadaun na’in hitu ne’e livre hosi sintoma COVID-19 tanba ne’e tenki fila ona ba ida-idak nia uma.

“Ita boot sira na’in hitu husi Otél Luxury ho Faról ne’ebé tama iha kuarentena ho loron ne’ebé mak la hanesan hotel luxury tama iha loron 11 fulan-abríl no Otél Faról tama iha loron 13 fulan-abríl no imi sai iha loron hanesan loron 28 hodi imi ba idaidak nia uma no hela fatin,” reforsa Belarmino da Silva Pereira.

Okaziaun ne’e, nia kontinua husu ba sira na’in hitu ne’e atu kumpre nafatin distánsia sosiál ho iha família, komunidade no sosiadade nia le’et hodi prevene transmisaun surtu coronavirus iha TL.

“Dahuluk nafatin halo distansia sosiál entre imi ho imi nia família tanba husi distánsia sosiál mak bele hadook husi COVID-19 hanesan estudante nafatin kumpre ijíene pesoál ne’ebé durante imi iha kuarentena, fase liman bebeik uza sabaun,”tenik tan.

Iha sorin seluk, Diretór Nasionál Finansa, Ministériu Administrasaun Estatál, Valente de Fátima Miranda kontinua reforsa katak dalan di’ak liu maka tenki kumpre nafatin regra sira ne’ebé fó sai ona hosi Ministériu Saúde hodi prevene transmisaun surtu COVID-19 ba ema seluk.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here