Prezidente Repúblika,Francisco Guterres Lú Olo. Imajen Tatoli/António Gonçalves

DILI, 28 abril 2020 (TATOLI)–Prezidente Repúblika, Francisco Guterres “Lú Olo”, ohin, Deklara Estadu Emerjénsia ba daruak, tanba konsidera direitu ba vida ema-nian importante liu no Estadu iha dever atu proteje Povu Timor-Leste.

“Desizaun ida ne’e laós fásil ba Prezidente Repúblika, nu’udár guardiaun ba Konstituisaun, tanba limita ka suspende direitus, liberdades no garantias balun ne’ebé ita-nia Konstituisaun fó ba sidadaun ida-idak. Maibé, tanba konsidera direitu ba vida mak direitu importante liu no, Estadu Timor-Leste iha dever atu proteje ita-nia Povu (Timor-Leste), Prezidente Repúblika, hafoin rona Konsellu Defesa no Seguransa no Konsellu Estadu, husu autorizasaun husi Parlamentu Nasionál atu deklara Estadu Emerjénsia,” Xefe Estadu Lee mensajen ba povu, bainhira deklara Estadu Emerjénsia iha Salaun Xina, Palásiu Prezidensiál ,Bairru Pité, Dili, tersa ne’e.

PR Lu Olo konta tuir katak, Iha dezembru tinan kotuk, mosu Coronavirus foun ida neebé kauza moras hanaran COVID-19. Moras ne’e hahú iha rai ida no hada’et ba rai sira seluk hosi ema ba ema no hada’et lalais de’it tanba ema ida bele infeta na’in rua ka liután.

Nune’e, Iha loron 30 janeiru 2020, Organizasaun Mundiál Saúde fó-hatene katak komunidade internasionál hasoru ona pandemia foun ida iha mundu. Governu Timor-Leste hahú kedas haree oinsá foti medida atu COVID-19 labele tama ita-nia rain no karik tama, ita la husik hada’et babeibeik.

Entretantu, iha 21 marsu, Governu fó-sai ba públiku katak moras ne’e tama ona iha Timor-Leste. Kazu COVID-19 pozitivu ida maibé importadu. Tanba pasiente ne’e hetan kedas tratamentu no izola kedas, moras ne’e la hada’et ba ema seluk.

Haree ba rai sira seluk nia esperiénsia katak di’ak liu foti medida lalais atu prevene no kontrola moras ne’e, Governu Timor-Leste husu ba Prezidente Repúblika atu deklara Estadu Emerjénsia.

“Ho laran haksolok tebes mak ita hotu rona deputadu ida-idak brani simu pedidu hosi Prezidente Repúblika atu proteje ita-nia Povu hosi moras aat ida, ne’ebé perigozu tebes tanba hamate daudaun ema rihun ba rihun iha rai sira seluk,” Xefe Estadu subliña.

Tanba Governu la foti kedas medida taka aeroportu, portu no fronteira-rai no halo kedas kuarentena ba sidadaun sira neebé tama mai Timor-Leste, kazu COVID-19 pozitivu seluk ida tama tan maibé detekta de’it bainhira ema ne’e sai tiha ona ba rai-liur.

Kazu pozitivu seluk tan tama ho estudante sira neebé mai hosi Indonézia maibé iha altura sira tama, ita iha tiha ona fatin kuarentena. Ho otel sira nakfila ba kuarentena, reponsável sira hosi área saúde nian bele kontrola moras ne’e la hadaet ba komunidade. Maibé, tanba fatin balun laiha kondisaun loloos ba kuarentena ka tanba okupante sira la halo tuir regra kuarentena nian, moras ne’e hada’et entre sira.

Tuir informasaun ikus liu husi Centro Integrado de Gestão de Crise, hamutuk ita iha ona kazu konfirmadu 24 ho COVID-19. Hosi totál ne’e, ema na’in neen rekupera ona. Kazu konfirmadu rua iha Liquiçá no ida ikus liuhosi Centru Tratamentu Vera Cruz mak preokupa liu tanba iha posibilidade katak iha ona transmisaun vírus corona no moras COVID-19 iha komunidade laran.

Tanba seidauk halo teste-em-massa ba komunidade, susar ba Centro de Gestão de Crise atu hatene loloos ema nain hira mak kontaminadu ona ho virus Corona. Banhira ita hatene sesé mak hetan ona virus corona ida ne’e, ita bele haketak afetadu sira atu moras COVID-19 labele hada’et ba beibeik.

“Ita presiza hanoin kle’an no hatán lalais ba risku transmisaun iha komunidade laran. Karik akontese ona, medida prevensaun no kontrolea tenke rigorozu liu atu salva ita-nia ema no mós sidadaun estranjeiru hotu-hotu ne’ebé serbisu ka hela iha ita-nia rain. Atu ita luta ho susesu hasoru COVID-19, ita presiza estuda esperiénsia iha rai sira seluk, liuliu iha Ásia, hanesan Xina, Singapura, Coreia do Sul no Japaun, atu ita hasees husi sala ne’ebé sira halo,”  nia subliña tan.

Iha rai sira ne’e hotu, responsável sira hanoin katak sira-nia nasaun livre tiha ona hosi COVID-19 maibé kazu pozitivu foun mosu fali tan. Husi sira-nia esperiénsia, timoroan aprende katak labele hamamar-an ho medida prevensaun no kontrola.

Nune’e, tanba moras COVID-19 sei la’o hela iha mundu no kazu pozitivu aumenta ba beibeik iha nasaun barak, inklui iha país viziñu, Indonézia katak iha posibilidade iha ona transmisaun iha komunidade iha Liquiçá no Dili no seidauk hatene bainhira mak bele simu rezultadu teste hosi Laboratóriu Nasional no konfirmasaun husi laboratóriu iha Darwin, Austrália.

Karik hetan kazu pozitivu ruma hosi teste sira ne’e, tenke halo teste ba komunidade tomak no foti medida rigorozu liután hanesan serka sanitária atu hamenus kontájiu, ita presiza duni hatutan Estadu Emerjénsia ba fulan ida tan atu Governu no entidade relevante sira bele prepara di’ak liután ba situasaun sira temi iha leten.

Hafoin simu pedidu husi Governu, iha 20 abril 2020, tuir lei haruka, Prezidente Repúblika konsulta uluk Konsellu Defeza no Seguransa no Konsellu Estadu molok husu autorizasau husi Parlamentu Nasional. Kuarta lokraek, 22 abril, Prezidente Repúblika hakerek ba Prezidente Parlamentu Nasional ho mensájen katak ita presiza hatutan Estadu Emerjénsia no fó kbiit ba Governu foti medida espesífiku atu prevene no kontrola moras COVID-19.

Difísil mai PR deklara Estadu Emerjénsia tanba medida ida ne e suspende ka limita ema nia direitus, liberdade no garantia neebé baibain ha’u defende, nu udar Prezidente Repúblika. Difísil mós tanba PR hatene katak Estadu Emerjénsia afeta maka’as duni famíla sira-nia moris, liuliu sira ne’ebé hetan de’it rendimentu ho negósiu fila-liman.

Emprezáriu ne’ebé de’it afetadu maka’as tanba empreza sira la iha kbiit atu selu traballador sira, dezempregu aumenta. Tanba ema la serbisu ka serbisu menus no laiha investimentu, ita-nia ekonomia nasional mós afetadu.

“Biar nune’e, ita presiza brani foti Estadu Emerjénsia tanba ita hakarak salva ema, ita-nia riku-soin boot liu. Riku-soin seluk, ita bele rekupera, ema-nia vida sei la rekupera,” nia reforsa liután.

Notísia Relevante: Prezidente Repúblika Promulga Estensaun Estadu Emerjénsia

Jornalista : Cipriano Colo

Editór     : Cancio Ximenes

HAKEREK NO HATÁN

Please enter your comment!
Please enter your name here