Primeiru-Ministru, Taur Matan Ruak hasoru malu ho Arcebispo ba Arquidiocese Metropolitana Dili, Virgílio do Carmo da Silva, iha Paço-Episcopal, Bidau-Lecidere, tersa (28/04). Imajen Tatoli/Egas Cristovão

DILI, 28 abríl 2020 (TATOLI) – Arcebispo Metropolitano Díli, Dom Virgílio do Carmo da Silva, konvida sarani katólika iha territóriu tomak atu hahú husi loron 1 to’o 31 maiu, reza-tersu iha kada família atubele salva no hadook-an husi surtu COVID-19.

“Ha’u hakarak husu ba sarani sira katak loron rua ka tolu tan ita hahú tama fulan-maiu, ba loron Na’in Feto ne’ebé Amu Papa halo ona apelu kapás loos no konvida sarani tomak iha mundu hala’o devosaun boot ba Na’in-Feto, liuliu ita iha Timor-Leste ne’e”, tenik Dom Bispo Virgílio hafoin enkontru ho Xefe Governu iha Paço-Episcopal, Bidau-Lecidere, tersa ne’e.

Ho nune’e, Dom Virgílio konvida sarani katólika hotu atu fó momentu espesiál hodi reza-tersu iha kada família, Igreja no Kapela.

“Sarani katólika iha Dioceze Dili no Timór tomak, ha’u konsulta ona ho Amo Bispo na’in-rua atu ita hahú loron 1 to’o 31 fulan-maiu ne’e iha tuku 18:00 lorokraik ne’e konvida igreja, kapela no kada família ida-idak atu reza-tersu”, Arcebispo Metropolitano Dili ne’e apela.

Amu Papa Francisco mós tama fulan-maiu ne’e hamutuk ho sarani sira iha mundu reza-tersu hodi hala’o devosaun ba Na’in-Feto hodi bali no salva mundu husi COVID-19.

Amo Virgílio dehan tan: “Liuliu ita Timór iha momentu iha situasaun luta kontra COVID-19 ita mós presiza reza atu Maromak no Na’in-Feto tulun ita, tanba Na’in-Feto mak ita bele dehan katak Patroeira Uma-kreda Timór ninian atu nafatin bali ita no salva ita husi buat hirak ne’ebé ita la espera”.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here