Arcebispo ba Arquidiocese Metropolitana Dili, Virgílio do Carmo da Silva. Imajen Tatoli/Egas Cristovão

DILI, 28 abríl 2020 (TATOLI) – Prezidente Repúblika, Francisco Guterres ‘Lú Olo’ liuhosi Dekretu Prezidensiál númeru 32/2020 promulga ona estensaun Estadu Emerjénsia períodu daruak ho durasaun loron-30, hahú loron 28 abríl oras 00:00 to’o 27 maiu 2020 oras 23:59, nu’udar meiu atu kombate propagasaun surtu COVID-19.

Antes ne’e, Parlamentu Nasionál halo apresiasaun ba pedidu renovasaun Estadu Emerjénsia, liuhosi rezultadu votasaun nominál pasa ho votu a-favór 37, kontra 23 no abstensaun 4.

Ba inisiativa ne’e, Arcebispo Metropolitano Díli, Dom Virgílio do Carmo da Silva, hateten nia parte apoiu desizaun estesaun Estadu Emerjénsia tanba konsidera nesesáriu atu Governu hakbiit no prepara di’ak liútan luta kontra COVID-19.

“Ha’u haree katak estensaun Estadu Emerjénsia ne’e nesesáriu tanba ita haree númeru kazu ne’e kontinua aumenta no númeru ba suspeitu sira mós sei iha. Tanba ne’e presiza duni fó tempu atu ita bele prepara-an didi’ak”, tenik Dom Bispo Virgílio hafoin enkontru ho Xefe Governu iha Paço-Episcopál, Bidau-Lecidere, tersa ne’e.

Notísia Relevante: Prezidente Repúblika Promulga Estensaun Estadu Emerjénsia

Dom Virigílio observa, durante ne’e haree ba nasaun viziñu sira hanesan Indonézia no Austrália nia númeru kazu COVID-19 kontinua aumenta, tanba ne’e Timor-Leste hanesan rai ki’ik-oan ho populasaun oituan de’it, presiza  prepara uluk kondisaun liuhosi medida sira atu perevene-an husi COVID-19.

Ho nune’e, Líder Igreja Dioseze Dili ne’e adianta, sidadaun hotu presiza kumpre medida sira ne’ebé estabelese ona hanesan fase lima ho sabaun, labele ka’er liman, uza máskara no iha uma de’it.

Kona-ba Komunidade balun hamlaha, Don Virgílio husu ba Governu atu halais apoia sosiál no ekonomia ba komunidade sira ne’ebé halerik ba ai-han atubele hakmatek iha ida-idak ninia fatin.

“Ita husu mak Governu tenke aselera lalais subsídiu atu povu bele hakmatek iha Estadu Emerjénsia”, Bispu ne’e sujere.

Arcebispo Metropolitano Díli ne’e mós apela ba povu tomak atu nafatin hakmatek tanba Timor-Leste nasaun ki’ik, ne’ebé ladún iha meiu ida atu kombate COVID-19.

“Ita nia kilat úniku atu funu hasoru COVID-19 mak dalan liuhosi prevensaun, katak ita haka’as-an atu prevene no tuir nafatin medida sira ne’ebé Governu  hato’o ona no  ita hotu tenke buka sakrifika ita-nia an hodi la’o tuir medida hirak ne’e. Ha’u fiar katak ida ne’e sei ajuda tebes ita atu la husik vírus ne’e kontinua habelar ba ita nia sosiedade laran”, nia salienta.

Ho nune’e, Dom Virgílio afirma Igreja mós deside nafatin atu suspende misa sira iha territóriu laran tomak to’o pandemia globál ne’e termina.

“Igreja mós sei kontinua mantein situasaun ida ne’e to’o buat hotu la’onormál”, nia realsa.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here