Primeiru-Ministru, Taur Matan Ruak hasoru malu ho Arcebispo ba Arquidiocese Metropolitana Dili, Virgílio do Carmo da Silva, iha Paço-Episcopál, Bidau-Lecidere, tersa (28/04). Imajen Tatoli/Egas Cristovão

DILI, 28 abríl 2020 (TATOLI) – Arcebispo Metropolitano  Díli, Dom Virgílio do Carmo da Silva, halo enkontru ho Primeiru-Ministru, Taur Matan Ruak, hodi aprezenta ekipa Dioceze Dili ne’ebé atu tulun Governu liuhosi Sentru Integradu Jestaun Krize (CIGC, sigla portugés) hodi fó suporta morál no espirituál ba pasiente konfirmadu COVID-19 iha sala izolamentu.

Arcebispo Metropolitano, Dom Virgílio do Carmo da Silva, hateten enkontru ne’e husi inisiativa Dioceze Dili  tanba iha semana hirak nia laran rona katak husi CIGC sempre temi dehan atu fó apoiu psikolójiku no morál, inklui espirituál ba maluk sira ne’ebé konfirmadu COVID-19 iha sala izolamentu.

“Ami koko atu tuur hamutuk ho ekipa no Dioceze, hodi forma ekipa oan ida no aprezenta ba ita nia Primeiru-Ministru  tanba nu’udar xefe ekipa CIGC, tanba ekipa ne’e prontu bainhira ekipa CIGC presiza apoia ruma husi Uma-Kreda ninian ba apoiu morál no espirituál”, tenik Dom Bispo Virgílio hafoin enkontru ho Xefe Governu iha Paço-Episcopál, Bidau-Lecidere, tersa ne’e.

Dom Virgílio adianta, ekipa ne’ebé Dioceze Dili forma ne’e atu apoia Governu hodi fó konsella maluk sira iha sala izolamentu atubele reziste hasoru COVID-19.

“Ekipa ne’e bele fasilita ekipa CIGC tanba ekipa ne’e kompostu husi Padre, Madre no irmaun sira ne’ebé prontu atu servisu hamutuk”, Bispu ne’e salienta.

Razaun Dioceze kria ekipa ne’e, Don Virgílio do Carmo realsa, haree ba timor-oan balun ne’ebé konfirmadu COVID-19 ho kondisaun stress no traumátika, entaun ekipa Dioceze hamutuk ho CIGC atu fó liafuan ruma hodi akonsella pasiente sira hodi hein to’o rekupera mak sai hodi integra ba sosiedade.

Enkontru ne’e, partisipa direta husi Xefe Governu ho Eminénsia Reverendíssima, Dom Virgílio do Carmo da Silva, Arcebispo Metropolitano Díli, no akompaña husi Madre Guilhermina Marçal, Padre Angelo Salsinha no Padre Adriano.

Jornalista: Florencio Miranda Ximenes

 Editora: Julia Chatarina

HAKEREK NO HATÁN

Please enter your comment!
Please enter your name here