Susuk aedes aegypti. Imajen hosi google

DILI, 28 abríl 2020 (TATOLI)-Tuir relatóriu hosi Ministériu Saúde relata hahú hosi fulan-janeiru to’o loron 27 fulan-abríl ne’e rejista ona ema na’in 1050 maka sofre moras dengue no na’in ualu mak mate iha territóriu Timor-Leste.

Portavós CIGC, Odete Viegas. Imajen/Egas Cristovão

Portavóz Sala Situasaun Sentru Integradu Jestaun Krize (CIGC-sigla portugés), Odete Viegas da Silva durante konferénsia imprensa iha CCD, tersa ohin hateten dengue mosu liuhosi susuk Aedes aegypti.

Hosi totál pasiente ne’e, iha Munisípiu Dili hamutuk kazu 628, Ermera 293 no kazu atus ida resin husi munisípiu 10 seluk hanesan Bobonaro, Aileu, Baucau, Lautem, Aileu, Manufahi, Covalima, Ainaro, Liquiça, Manatuto.

Maibé hosi Rejiaun Autónomu Espesiál Oé-Cusse Ambeno (RAEOA) ho Viqueque seidauk relata relatóriu servisu ba Ministériu Saúde.

“Kazu ema mate na’in ualu husi Dili na’in neen, Baucau na’in ida no Covalima na’in ida tanba Dengue,” tenik Doutóra Odete Viegas da Silva.

Nia esplika pasiente ho sintoma dengue maka hanesan mosu isin manas maka’as durante loron haat to’o hitu, ulun moras maka’as iha área matan retro orbitrál, isin no ruin moras maka’as, laran sa’e no muta, diárea, mosu kafuak mean iha isin loloon no seluk tan.

“Sinal no sintoma sira dengue iha tipu rua, dengue isin manas no dengue Isin manas no’o raan, dala barak liu kazu mate maihusi Dengue isin manas no’o raan tanba dengue tipu ida ne’e iha posibilidade boot atu lori ema ida ba kondisaun dengue shock síndrome tanba kauza raan sai husi inus, matan, muta raan, liur raan, no kauza ita isin lakon liqúidu barak ne’ebé lori ema ida tama ba kondisaun ida ne’ebé grave ho falla multiorgaun,”katak Odete.

Tanba ne’e CIGC apela ba populasaun hotu tenki halo limpeza hodi hamoos uma huun hanesan bee nalihun, taka be tanki sira, proibíu tara roupa iha uma laran no seluk tan hodi prevene moras dengue.

Jornalista   : Hortencio Sanchez

Editór         : Agapito dos Santos

HAKEREK NO HATÁN

Please enter your comment!
Please enter your name here