Imajen Tatoli/Evaristo Soares Martins.

DILI, 28 abríl 2020 (TATOLI)—Bankada Parlamentár Congresso Nacional da Recosntrução de Timor (CNRT), ejize loke investigasaun ba kazu ameasa Konselleiru Máximu Partidu KHUNTO, José dos Santos ‘Naimori’.

Ezijensia ne’e Bankada CNRT hato’o bazeia deklarasaun iha loron 24 abril 2020 ne’ebé Deputada KHUNTO, Olinda Guterres, foti iha reuniaun líder bankada iha Parlamentu Nasional hodi halo akuzasaun hasoru kuadru Partidu CNRT, Jacinto Rigoberto katak lori kilat halo ameasa ba Konseleiru Superior Partidu KHUNTO, José dos Santos ‘Naimori’ iha ninia rezidénsia iha loron kinta-feira (23/04/2020).

“Ami lamenta tebes ho akuzasaun organizadu ida-ne’e kontinua levanta iha plenária (27/04/2020) hosi Bancada FRETILIN ne’ebé sekunda hosi Deputada Olinda Guterres hodi manipula informasaun bosok hodi asalta ema seluk ninia reputasaun no onra ne’ebé protejidu iha Konstituisaun-da-Repúblika. Jacinto Rigoberto hanesan ema sívil ida, iha ninia kareirra polítika tomak, nia serbisu laiha relasaun ho serbisu militár no polísia nian, ka foti parte iha grupu armada sira iha ita-nia país demokrátiku ida-ne’e. Ami hakarak afirma katak Partidu CNRT dezde inísiu kedas laiha programa fahe kilat ba grupu armadu atu halo ameasa ba ema/sidadaun Timor sé de’it, tantu ba ema polítiku sira no ema estranjeiru iha ita-nia rain,” dehan Vise-Xefe Bankada Parlamentár CNRT, Patrocínio Fernandes dos Reis, liuhosi konferénsia imprensa, iha sala bankada CNRT, iha Parlamentu Nasionál, tersa ne’e.

Bankada CNRT foti pozisaun no konsidera akuzasaun bosok no falsu hasoru Jacinto Rigoberto no Partidu CNRT hatudu momoos ba Povu tomak katak, iha ona grupu organizadu ho nia imunidade subar iha Parlamentu Nasionál ho sistemátiku halo beibeik polítika foer hasoru ninia oponente polítiku sira.

Bandeira partidu CNRT. Foto espesiál.

“Akuzasaun ne’ebé levanta hosi duputada Olinda Guterres Bankada KHUNTO iha reuniaun lideres bankada dia 24 de abril de 2020 iha Parlamentu Nasional ne’e falsu tanba José dos Santos Naimori rasik ninia siguransa desmente informasaun ne’e. Bankada CNRT husu ba Ministériu Públiku no PNTL atu halo lalais investigasaun profunda sobre “missão oculta – objetivu sasubar” iha kazu ida- ne’e. Atu buka hatene envolve sé deit no objetivụ sira nian ba saída loos,” hateten Patrocício Fernandes, ne’ebé akompaña hosi Xefe Bankada CNRT, Duarte Nunes.

Bankada CNRT husu ba deputada Olinda Guterres atu esplika no klarifika ba iha públiku sobre informasaun falsu ne’e.

“Jacinto Rigoberto ho Partidu CNRT sei lori prosesu ne’e ba oin hodi husu responsabilidade ba ema hirak ne’ebé mak halo akuzasaun falsu hodi hasoru Rigoberto no Partidu CNRT hodi hetan hikas naran di’ak no lia-loos,” dehan Vise-Xefe Bankada CNRT ne’e.

Entertantu, Sekretáriu Jerál Partidu CNRT Ein-Ezersísiu atuál Adjuntu Sekretáriu CNRT, Jacinto Rigoberto, rezeita akuzasaun ne’ebé hato’o hosi Deputada KHUNTO, Olinda Guterers, kona-ba ema uza kilat ameasa Naimori.

“Ha’u rezeita no lamenta tebes ho akuzasaun falsu hosi Membru Parlamentu Nasionál balun (Deputada Olinda) ne’ebé iha enkontru lider Bankada iha uma fukun parlamentu nasional akuza ha’u ata, Jacinto Rigoberto, tau ninja hamutuk ho ema na’in-haat ho kilat uza karreta Pick Up laiha xapa iha oras 11.40 ba ameasa bou NAIMORI nu’udar Konselleiru Máximu iha nia rezidénsia. Ho akuzasaun falsu ida-ne’e halo públiku no mídia sosiál sira-ne’ebé ho intensaun polítika diferente aproveita hodi divulga no halo atake ba ha’u ho ha’u-nia partidu CNRT. Dala ida tán akuzasaun ne’e falsu no lamentável tebes nu’udar reprezentante povu iha uma fukun Parlamentu Nasionál ne’ebé atu defende lia-loos no povu nia direitu,” Jacinto Rigoberto, informa liuhosi konferénsia, iha sala bankada CNRT, iha Parlamentu Nasionál, tersa ne’e.

Akuzasaun falsu ida ne’e implika tebes ba Jacinto Rigoberto no  nia família nia situasaun, nune’e mós halo família tomak pániku no iha trauma nia laran.

“Maske Deputada Olinda iha sábadu dadeer telefone ha’u (Rigoberto) hodi husu deskulpa, katak nia ko’alia iha enkontru liders bankada ne’e naran ko’alia de’it tanba rona hosi ema no nia iha hela kondisaun saúde ne’ebé ladún di’ak,” nia dehan.

Rigoberto dehan nia parte laiha direitu no kbiit atu uza kilat tanba tuir lei ema ne’ebé iha direitu kaer kilat só F-FDTL no PNTL de’it.

Jacinto Rigoberto husu Ministériu Defeza no Seguransa tenke buka hatene sé maka halo asaun ida-ne’e. Neduni keta iha duni ema ruma ho arma ba duni Bou Naimori nia rezidénsia, ne’e só polísia ho FFDTL mak bele hatene.

“Iha kinta dadeer por volta tuku 9:00resin, ha’u ba duni Bou   NAIMORI nia rezidénsia ho ha’u-nia karreta pajero ida ho  xapa-matríkula kompletu. Ha’u ba BOU NAIMORI hodi halo komunikasaun no kordenasaun tanba KHUNTO nu’udar partidu ida-ne’ebé formalmente hamutuk hela ho partidu 5 seluk iha AMP nia laran. Ha’u la’ós ba halo komunikasaun hodi sobu fali partidu seluk nia aliadu,” nia dehan.

Durante nia parte enkontru ho Naimori, ko’alia iha ambiente ida-ne’ebé amigável iha ámbitu AMP nia laran hanesan bainbain ho komitmentu ne’ebé nafatin.

“Laiha lojika liu ha’u ho ha’u-nia partidu CNRT ba ameasa fali KHUNTO ne’ebé hamutuk hela iha AMP nia laran. Ne’eduni ema ne’ebé lansa issue sira-ne’e, sira maka hakarak sobu AMP (Aliansa Maioria Parlamentár) atu bele asegura sira-nia interese polítiku,” nia tenik.

“Ne’eduni dala ida tan ha’u ho ha’u-nia partidu CNRT rezeita total akuzasaun falsu ne’e, no husu atu autoridade kompetente tenke halo investigasaun ne’ebé kle’an no transparente no lais sobre asuntu ida ne’e.  Husu mós atu investiga ema  sira ne’ebé iha FB ne’ebé divulga no halo akuzasaun falsu sira ne’e,” hateten Jacinto Rigoberto.

Jacinto Rigoberto sei hato’o keixa ba autoridade kompetente hodi loke investigasaun ba akuzasaun falsu ne’e hodi hatene verasidade kazu hasoru Naimori ne’e.

Entretantu Deputada KHUNTO, Olinda Guterres, husu ona deskulpa ba Sekretáriu Jerál Partidu CNRT Ein-Ezersísiu atuál Adjuntu Sekretáriu CNRT, Jacinto Rigoberto tanba sente infromasaun ne’e falsu no rona tutan hosi ema seluk.

“Ha’u husu deskulpa ona ba maun Rigoberto, momentu ne’e ha’u rona tutan hosi ema tanba ne’e mak ha’u levanta iha reuniaun líder bankada maibé informasaun sira-ne’e falsu. Molok ha’u foti buat ne’e virál ona. Maun Rigoberto ne’e família ho ami-nia konselleiru (Naimori),” Deputada Olinda Guterers, informa ba Agência TATOLI, liuhosi telemovel, tersa ne’e.

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here