Prezidenti Repúblika Francisco Guterres Lu Olo tula hela deviza ba João Miranda (Aluk) iha serimonia promosaun deviza hosi koronél ba Brigaderu Jenerál iha Palacio Prezidenti, 07 Maiu 2018. Imajen/Dok.TATOLI

DILI, 28 abríl 2020 (TATOLI) – Segundu Komandante Operasionál Sala Situasaun Sentru Integradu Jestaun Krize (CIGC-sigla Portugés), Brigadeiru Jenerál, João Miranda Aluk, apresia ho relatóriu Provedór Direitu Umanu no Justisa (PDHJ) nian durante aplikasaun situasaun estadu emerjénsia  ne’ebé nota katak membru Polisia Nasional Timor-Leste (PNTL) balun viola direitu fundamental ema-nian no mós la kumpre ba regra estadu emerjénsia.

Notísia Relevante : Estadu Emerjénsia, PDHJ Rejista Keixa Hitu

Brigadeiru Jenerál Aluk husu ba Komandu PNTL ho Komandu FALINTIL-Forsa Defeza Timor-Leste (F-FDTL) hodi kontrola nia-membru sira ne’ebé ezekuta serbisu orden estadu emerjénsia nian iha terrenu  atu labele uza forsa hodi viola direitu sidadaun sira-nian durante implementasaun Estadu Emerjénsia (EE).

Brigadeiru Jenerál Aluk hatutan, mezmu PDHJ halo monitoriza no akompaña serbisu PNTL ho F-FDTL, maibé too agora, Sala Situasaun Sentru CIGC seidauk simu relatóriu hosi PDHJ hodi aprezenta ba Komandu PNTL no F-FDTL.

“Ami mós rona informasaun balun, ami tenta aviza ba Komandu PNTL no F-FDTL nia membru sira ne’ebé halo operasaun iha terrenu atu evita viola direitu fundamentu ema-nian. Maibé to’o agora ami seidauk simu relatóriu ou karta ruma hosi PDHJ, Aluk hateten hodi responde pergunta Ajénsia Tatoli, ohin,  iha Palacio do Governo, Dili.

Relatóriu  PDHJ nian ne’ebé publika ona katak, PDHJ  simu keixa hitu (7) hosi komunidade kompostu hosi kazu indísiu violasaun direitu umanu lima (5) ne’ebé komete hosi membru PNTL balun uza forsa halo agresaun fíziku hasoru komunidade iha Munisípiu Dili, Bobonaro, (Maliana) ho Covalima (Suai Loro).

Keixa rua seluk maka iha implementasaun EE ba loron dahuluk nian autoridade seguransa sala halo interpretasaun ba implementasaun dekretu governu númeru 3/2020 hodi haruka taka atividade komersiál balun iha Dili.

Haree ba relatóriu ne’e, Segundu Komandante Operasionál CIGC Brigadeiru Jenerál Aluk, promote koopera nafatin ho PDHJ atu monitoriza forsa rua nia serbisu no karik iha membru balun komete krime maka komandu forsa rua sei prosesa nia membru sira tuir lei.

“Ami husu mós ba membru forsa rua no komandu atu idak-idak atu situasaun seguransa tenke tuir medida serbisu ne’ebé maka foti. Ita labele aproveita situasaun ida ne’e (EE) hodi ultrapasa fali medida sira ne’ebé maka la loos,” Brigadeiru Jenerál Aluk afirma-tan.

Nia hatutan, komandu forsa rua mós presiza halo investigasaun interna ba membru sira bazeia ba relatóriu PDHJ hodi normaliza membru sira-nia atuasaun iha terrenu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here