Xefe Aldeia Terminál, Suku Camea, Manuel Celestino Freitas. Imajen Tatoli/Osória Marques.

DILI, 28 abril 2020 (TATOLI)–Autoridade lokál  iha Aldeia Terminál Becora daudaun ne’e rejistu ona Xefe família ka komunidade sira ne’ebé hetan fixa família husi tinan 2011-2017 hamutuk 332 atu bele asesu ba subsidiu iha situasaun Estadu Emerjensia nia laran ne’e liuhosi Politika Ekonomika ne’ebé Governu trasa ona.

Xefe Aldeia Terminál, Suku Camea, Manuel Celestino Freitas hateten, hosi total refere iha Xefe Família tuan hamutuk 267 ne’e iha fixa família no Xefe família foun hamutuk 65 maibé laiha fixa família.

“Totál xefe família iha ami nia Aldeia Terminál hamutuk 332 uma-kain. Husi Xefe família 332, ita-nia fixa família tuan nian hamutuk hamutuk 267 no foun 65 Xefe família,” dehan Xefe Aldeia Terminal Becora, Manuel Celestino Freitas, ba jornalista sira iha Terminál Becora,  Camea, Dili, tersa ne’e.

Nia informa, totál polulasaun iha Aldeia Terminál hamutuk 1822 kompostu hosi mane na’in 908 no feto na’in 914.

Xefe Aldeia Terminál Suku Kamea Postu administrativu Cristu Rei Munisípiu Dili ne’e hateten, iha Estadu Emerjénsia ba COVID-19 nian la halo rejistu foun ba komunidade ka sidadaun ne’ebé foin harii família foun.

“Ami-nia komunidade sira iha Aldeia Terminál, dadus kompletu hotu ona no ohin ami finaliza ona atu lori ba Sede Suku Camea hodi bele prosesa nune’e ita-nia komunidade sira bele hetan subsidiu iha Estadu Emerjénsia ba COVID-19 nian. Dadus refere ami rejistu hahú bainhira eleisaun ramata, ami rekolla no rejistu tuir dadus komunidade sira-nian,” Xefe Aldeia Terminál ne’e dehan.

Tuir nia, komunidade sira ne’ebé mak hela temporária iha aldeia refere, nia eleitorál Xefe Aldeia rekolla hotu ona maibé sira-nia eleitorál la’ós bairru Terminál nian.

“Entaun ami preokupa uitoan tanba ita seidauk iha desizaun ida hosi Governu katak komunidade temporária ne’e oinsá. Ho ida ne’e ami hakarak hato’o ba Governu katak fó desizaun ida ba ami atu ami mós bele atende komunidade sira hela temporária,” nia subliña.

Nia hatutan, fixa família ne’ebé atu ba hatama iha Xefe Suku Camea ne’e ba sira ne’ebé iha ona fixa família no eleitorál husi Aldeia Terminál duni. Maibé ba komunidade sira ne’ebé hela provizóriu iha Aldeia Terminál, nia parte sei la halo sira-nia fixa família.

Ho preokupasaun komunidade balun nian ne’ebé ema barak mak kbiit la to’o ona hodi moris, Xefe Aldeia Terminál husu ba Autoridade Suku atu aselera lalais dokumentu sira nune’e Governu bele atende lalais.

“Ita labele hakilar de’it iha ne’e, maibé dadus ida la tama iha Governu entaun oinsá mak Governu bele responde lalais,” nia dehan.

Xefe Aldeia Manuel Celestino apela ba Xefe Aldeia no Xefe Suku atu labele aproveita de’it situasaun Estadu Emerjénsia ba COVID-19 mak foin rejistu ba komunidade maibé fulan tolu-tolu tenke tún halo rejistu ba komunidade nune’e fasil bainhira iha subsidiu ruma ba povu.

Juventude, António Ximenes. Imajen Tatoli/Osória Marques.

Entretantu, juventude Aldeia Terminál, António Ximenes hateten, dadus finál ba fixa família submete tarde ba Xefe Suku Camea tanba komunidade sira balun ba fali munisípiu entaun hein sira tún husi munisípiu mak foin rejistu no submete ba suku.

Nia hateten, ida seluk mak komunidade balun hela permanente iha Aldeia Terminál maibé kartaun eleitorál husi munisípiu nian entaun susar sira atu trata dokumemtu hanesan fixa família iha aldeia agora hela bá.

“Tanba ne’e ami husu ba parte kompetente atu buka meiu ida oinsa, nune’e sira mós bele hetan subsidiu tanba sira mós kbiit la’ek hotu,” nia sujere.

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here