Prezidente Repúblika,Francisco Guterres Lú Olo. Imajen Tatoli/António Gonçalves

DILI, 27 abril 2020 (TATOLI)—Prezidente Repúblika, Francisco Guterres Lú Olo, ohin (segunda, 27 abril 2020), liuhosi Dekretu Prezidensiál númeru 32/2020 promulga estensaun Estadu Emerjénsia períodu daruak ho durasaun loron-30, hahú husi oras 00.00 husi 28 abril 2020 to’o oras 23:59 27 maiu 2020 nu’udar dalan di’ak liu ba prevensaun no kombate surtu COVID-19.

Tuir komunikadu ne’ebé fó sai hosi Prezidénsia Repúblika hateten, deklarasaun Estadu Emerjénsia abranje territóriu nasionál tomak ho fundamentu hasees sidadaun hotu-hotu ne’ebé hela iha Timor-Leste hosi kalamidade públika ne’ebé bele mosu hosi surtu COVID-19.

Estadu emerjénsia ne’ebé Prezidente Repúblika deklara iha sesta (27 marsu 2020), ramata iha loron horisehik (domingu, 26 abril 2020). Bainhira Prezidente Repúblika deklara Estadu Emerjénsia ne’e kazu pozitivu COVID-19 iha Timor-Leste ne’e foin ema na’in-ida (1) de’it ho COVID-19 no ohin loron Timor-Leste iha kazu pozitivu na’in-22 no rekuperadu na’in-6.

Haree ba númeru kazu iha nivel global no Timor-Leste ne’ebé aumenta ba beibeik, Governu hatama proposta estensaun Estadu Emerjénsia atu fó protesaun ba saúde públika iha Repúblika Demokrátika Timor-Leste no iha meiu legál atu bele halo intervensaun ho lalais iha prevensaun COVID-19 atu la hada’et moras ne’e ba beibeik no hamate ema barak.

Hafoin simu pedidu husi Governu, iha kuarta (22 abril 2020), Prezidente Repúblika rona hanoin sira hosi Konsellu Estadu (KE) no Konsellu Superiór Defeza no Seguransa (KSDS) ne’ebé ho unanimidade husu Xefe Estadu hakerek karta ba Parlamentu Nasionál ba estensaun estadu emerjénsia.

Ohin, segunda (27 abril 2020), Parlamentu Nasionál aprova pedidu estensaun Estadu Emerjénsia hosi Prezidente Repúblika ba renovasaun Estadu Emerjénsia liuhosi trezultadu votasaun nominál a-favór 37 kontra 23 no abstensaun 4.

Estadu Emerjénsia sei parsialmente suspende direitu, liberdade no garantia balun sidadaun ninian nu’udar dalan di’ak liu ba prevensaun transmisaun COVID-19, liuhusi kontrolu sanitáriu iha portu no aeroportu, liberdade ba sirkulasaun, direitu ba reuniaun, manifestasaun no rezisténsia, atividade sosiál no direitu traballadór sei limite atu salva povu nia moris.

Deklarasaun Estadu Emerjénsia sei laiha efeitu ba moris, integridade fízika, kapasidade sivíl no sidadania, la retroativu ba lei penal, defeza ba prosesu kriminal, liberdade ba konsiénsia no relijiaun, la sai sujeitu ba torturasaun, eskravatura, tratamentu kruel, dezumanu no la diskriminativu.

Estadu Timor-Leste aprende hosi nasaun sira ne’ebé tarde foti medida preventiva sira atu kombate COVID-19 ikus mai lori efeitu boot ba nasaun, ema barak mate no kontaminadu. Estensaun ba estadu emerjénsia ne’e nu’udar kontinuasaun hosi medida preventiva no kombate hasoru COVID-19 ne’ebé estadu foti atu proteje nia sidadaun, povu no País.

Mundialmente Coronavírus (COVID-19) hada’et ba ema liu millaun 3 no hamate ema 207 mil iha nasaun 193.

Notísia Relevante: PN Haruka Ona Karta Autorizasaun Estensaun EE Ba PR Lú Olo

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here