Primeiru-Ministru, Taur Matan Ruak, akompaña ho membru governu sira, debate kona-ba pedidu estensaun ba deklarasaun Estadu Emerjénsia husi Prezidente Repúblika, iha Plenária Parlamentu Nasionál, segunda (27/04). Imajen Tatoli/António Gonçalves

DILI, 27 abríl 2020 (TATOLI)—Xefe Bankada Parlamentár UDT-FM, Francisco David Xavier Carlos, observa katak implementasaun Estadu Emerjénsia durante fulan-ida halo povu lakon esperansa ba moris.

“Ho estadu emerjénsia ida-ne’e povu lakon esperansa moris tanba durante ne’e seidauk rejista mate maibé moras dengue ne’e rasik oho tiha ona ema. Povu lakon esperansa moris tanba atividade ekonomia la hala’o hanesan atividade ambulante roda tolu sira,” dehan Francisco David Xavier Carlos liuhosi plenária, Parlamentu Nasionál, segunda ne’e.

Nia afrima, ho distánsia sosiál ne’ebé implementa iha períodu implementasaun estadu emerjénsia halo povu labele halo negósiu.

“Povu barak mós tanis no barak mós halerik hodi hatete katak ami moe bainhira mate hamlaha duké ami mate tanba Coronavirus. Se ita autoriza hodi estadu emerjénsia ne’e iha kontinuasaun tán, nia impaktu ne’e sei boot liután no atu fó-sala ba sé,” nia dehan.

Nia hateten, populasaun barak preokupadu tanba orsamentu millaun $150 parlamentu aprova ona maibé to’o agora seidauk to’o ba povu nia liman.

Entretantu, Deputada UDT/FM, Isabel Maria Barreto Freitas Ximenes, afirma ho implementasaun estadu emerjénsia durante fulan ida-ne’e halo povu hahú hamlaha no nasaun lakon fonte rendimentu sira.

“Ho situasaun estadu emerjénsia, Governu obriga taka kioske kiik-oan sira no vendedór kiik sira maibé autoriza supermerkadu boot sira loke, ne’e injustisa. Situasaun ida-ne’e sé mak hetan benefísiu. Povu kiik ka emprezáriu boot sira,” nia hateten.

Deputada Isabel Barreta hateten, ho situasaun ida-ne’e emprezáriu supermerkadu sira mak hetan rendimentu boot maibé povu kiik sira moris iha terus laran.

Notísia Relevante: PD-FRETILIN Husu Líder Istóriku Tau Forsa Hamutuk Kombate COVID-19

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here