Inundasaun iha Kapitál Dili, 13 marsu 2020. Imajen/Dok.Tatoli

DILI, 27 abríl 2020 (TATOLI) – Governu liuhosi Sekretária Estadu Protesaun Sivíl (SEPS) sei distribui apoiu emerjénsia ba família 2.117 ne’ebé afetadu hosi inundasaun iha loron 13 marsu 2020.

Notísia Relevante : Dadus Provizóriu, Xefe Família 4286 Afetada Ba Inundasaun

Tuir dadus tuir hosi SEPS inundasaun ne’ebé akontese liu-liu iha area Suku Bekora, Bidau no sira seluk-tan, família uma-kain hamutuk 4.800 mak sai afetadu. Hosi númeru ne’e, família 2.700-resin mak hetan ona apoiu emerjénsia no família uma-kain 2.117 hosi Suku Maskarinhas, Caicoli ho Becora no inklui balun hosi parte Bidau nian seidauk hetan apoiu emerjénsia hosi governu.

Sekretáriu Estadu Protesaun Sivíl, Alexandrino de Araújo. Imajen /Egas Cristovão

Sekretáriu Estadu Protesaun Sivíl, Alexandrino Araújo Xavier, segunda (27/04/2020), konvoka ona enkontru ho autoridade postu no suku hodi fó orientasaun hodi kumpre medida sira parte saúde liu-liu mantén distánsia fíziku metru ida, prepara bee nh sabaun fase-liman iha suku sira, uza máskara, nune’e bele, halo prevensaun ba propagasaun Coronavirus ka COVID-19 durante distribuisaun ne’e la’o.

“Komesa tersa ohin, kontinua distribui fila-fali apoiu emerjénsia ba família afetadu inundasaun foin lalais ne’ebé seidauk hetan apoiu,” hateten Sekretáriu SEPS Alexandrino Araújo Xavier ba Ajénsia Tatoli, hafoin remata enkontru iha salaun SEPS iha Caicoli, Dili.

Nia hatutan, presiza tebes mekanizmu di’ak tanba  distribuisaun apoiu umanitária ne’e iha ámbitu propagasaun surtu COVID-10, ho nune’e, iha distribuisaun ne’e só ema ne’ebé naran iha lista mak marka prezensa no tenke kontrolu ba iha movimentasaun.

SEPS Alexandrino Araújo Xavier mós informa katak, iha orsamentu hosi fundu kontinjénsia milaun dollar rua-resin ne’ebé aprova hodi prevee atu responde apoiu re-kooperasaun.

“Ekipa SEPS sei tun tan dala-ida iha terrenu hodi halo levantamentu hodi bele identifika didi’ak uma ne’ebé merese atu hetan apoiu,” tenik Alexandrino Araújo Xavier.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here