Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 27 abríl 2020 (TATOLI)—Hafoin aprova pedidu estensaun Estadu Emerjénsia, ohin, Parlamentu Nasionál haruka kedas ona karta autorizasaun renovasaun deklarasaun Estadu Emerjénsia (EE) ba Prezidente Repúblika, Franscisco Guterres ‘Lú Olo’, hodi dekreta no públika iha Jornál Repúblika

Prezidente Parlamentu Nasionál, Arão Noé de Jesus da Costa Amaral hateten, parlamentu haruka ona karta ne’e ba Gabinete Prezidente Repúblika nian, atu nune’e Prezidente Repúblika bele promulga.

“Parlamentu envia (haruka) kedas ba Gabinete Prezidente Repúblika nian, agora daudaun lori sai ba ona nune’e Prezidente Repúblika bele promulga kedas no tenke públika iha Jornál Repúblika tanba tama em vigor tenke públika iha Jornál Repúblika,” Prezidente Parlamentu Nasionál, Arão Noé de Jesus da Costa Amaral, ko’alia iha Parlamentu Nasionál, segunda ne’e.

Pedidu renovasaun deklarasaun Estadu Emerjénsia (EE) ne’e aprova liuhosi rezultadu votasaun nominál a-favór 37 kontra 23 no abstensaun haat (4) hafoin deputadu sira halo apresiasaun ba pedidu refere iha Plenária Parlamentár iha Parlamentu Nasionál.

Prezidente Parlamentu Nasionál fó-sai katak, renovasaun ba estadu emerjénsia ba territóriu nasionál tomak durante loron 30 (tolunulu), hahú hosi 28 fulan-abríl 2020 (loron-tersa) tuku 00:00 to’o loron 26 fulan-maiu 2020 (loron-tersa) tuku 23:59.

Prezidente Repúblika, Francisco Guterres ‘Lú Olo’ hato’o pedidu estensaun ba Parlamentu Nasionál iha loron-kuarta, 22 abríl 2020.

Iha karta pedidu ne’e Prezidente Repúblika husu autorizasaun ba Parlamentu Nasionál bazeia artigu 85 alínea g Konstiutuisaun RDTL, hamutuk ho artigu 9, 10, 11, 15, no 27 hosi lei nú 3/2008, ho data 22 fevereiru (Rejime ba Estadu Sítiu no Estadu Emerjénsia nian).

Ho estadu emerjénsia ne’e, sidadaun sira-nia direitu, liberdade no garantia sira balun sei suspende hanesan sirkulasaun internasionál, liberdade sirkulasaun no hela iha fatin ne’ebé de’it iha territóriu nasionál, direitu ba reuniaun no manifestasaun, liberdadade kultu nian bainhira envolve ema barak, direitu ba rezisténsia, direitu ba propriedade no inisitiva ekonómika privada no direitu ba traballadór sira-nian.

Notísia Relevante: PN Aprova Pedidu Estensaun EE, CNRT Vota Kontra

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here