Primeiru-Ministru, Taur Matan Ruak, akompaña ho membru governu sira, debate kona-ba pedidu estensaun ba deklarasaun Estadu Emerjénsia husi Prezidente Repúblika, iha Plenária Parlamentu Nasionál, segunda (27/04). Imajen Tatoli/António Gonçalves

DILI, 27 abríl 2020 (TATOLI)—Parlamentu Nasionál (PN) aprova ona pedidu hosi Prezidente Repúblika, Francisco Guterres ‘Lú Olo’, kona-ba estensaun Estadu Emerjénsia (EE) maibé bankada CNRT vota kontra.

Prezidente Repúblika, Francisco Guterres ‘Lú Olo’, hato’o pedidu estensaun estadu emerjénsia ne’e ba Parlamentu Nasionál iha loron-kuarta, 22 abríl 2020.

Iha karta pedidu ne’e, Prezidente Repúblika husu autorizasaun ba Parlamentu Nasionál bazeia ba artigu 85 alínea g Konstiutuisaun RDTL, hamutuk ho artigu 9, 10, 11, 15, no 27 hosi lei nú 3/2008, ho data 22 fevereiru (Rejime ba Estadu Sítiu no Estadu Emerjénsia nian)

Xefe Estadu husu fó autorizasaun hodi deklara renovasaun ba estadu emerjénsia ba territóriu nasionál tomak durante loron 30 (tolunulu) hahú hosi 28 fulan-abríl 2020 (loron-tersa) tuku 00:00 to’o loron 26 fulan-maiu 2020 (loron-tersa) tuku 23:59.

Ho estadu emerjénsia ne’e, sidadaun sira-nia direitu, liberdade no garantia sira balun sei suspende hanesan sirkulasaun internasionál, liberdade sirkulasaun no hela iha fatin ne’ebé de’it iha territóriu nasionál, direitu ba reuniaun no manifestasaun, liberdadade kultu nian bainhira envolve ema barak, direitu ba rezisténsia, direitu ba propriedade no inisiativa ekonómika privada no direitu ba traballadór sira-nian.

Hafoin halo apresiasaun ba pedidu estensaun Estadu Emerjénsia refere, liuhosi rezultadu votasaun nominál a-favór 37 kontra 23 no abstensaun 4.

Prezidente Parlamentu Nasionál, Arão Noé de Jesus da Costa Amaral, anunsia deklarasaun estadu emerjénsia aprovadu.

Antes PN halo aprovasaun, Deputadu sira hosi CNRT maioria vota kontra tanba ho razaun parlamentu aprova orsamentu millaun $150 maibé to’o oras ne’e Governu seidauk implementa.

“Vota kontra tanba parlamentu aprova orsamentu ho karáter urjénsia maibé governu la implementa orsamentu ne’e ho urjénsia,” Deputada CNRT, Maria Fernanda Lay, argumenta liuhosi plenária, Parlamentu Nasionál, tersa ne’e.

Deputada Virgínia Ana Belo, argumenta vota kontra tanba parlamentu aprova ona orsamentu millaun $150 maibé to’o agora seidauk implementa.

Entretantu, Vise-Xefe Bankada Parlamentár FRETILIN, Francisco Miranda Branco, vota a-favór tanba pandemia ne’e perigu tebes.

“Tanba ita hatene ema iha rai seluk mate barak tanba moras ida-ne’e no to’o ikus sira reza tanba ema mate barak,” nia dehan.

Xefe Bankada KHUNTO, António Nobre Amaral Tilman, vota a-favór tanba propagasaun virus ne’e perigu tebes iha mundu.

“Ha’u vota a-favór tanba fó tempu ba Governu hodi kria kondisaun atu proteze ita-nia povu,” nia hateten.

Nune’e mós, Deputada KHUNTO, Olinda Guterres, vota a-favór tanba moras ida-ne’e matan-delek.

Iha biban hanesan, Vise-Xefe Bankada Parlamentár PLP, Francisco de Vasconcelos hateten, nasaun jigante iha mundu mak Estadu Unida Amérika (EUA) maibé tanis tanba propagasaun COVID-19.

“Ha’u vota a-favór no ha’u lakohi politiza sasán no hakarak salva povu hosi moras ida-ne’e. Bankada PLP apoia sein rezerva ba estensaun deklarasaun Estadu Emerjénsia, sé fulan-ida labele, aumenta tán,” hateten Vise-Xefe Bankada PLP ne’e.

Entretantu, Deputadu PD, Mariano ‘Assanami’ Sabino, vota a-favór maibé husu atu implementa ona subsídiu ba povu sira. Purtantu Deputadu Adriano do Nascimento, auziénsia iha votasaun ne’e.

Notísia Relevante: UDT-FM Observa Estadu Emerjénsia Halo Povu Lakon Esperansa

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here