Primeiru-Ministru, Taur Matan Ruak, akompaña ho membru governu sira, debate kona-ba pedidu estensaun ba deklarasaun Estadu Emerjénsia husi Prezidente Repúblika, iha Plenária Parlamentu Nasionál, segunda (27/04). Imajen Tatoli/António Gonçalves

DILI, 27 abríl 2020 (TATOLI) – VIII Governu Konstitusionál rekoñese estensaun Estadu Emerjénsia bele fó impkatu ba atividade ekonómika iha territóriu Timor-Leste, maibé  atividade ekonomia ne’e bele rekupera iha futuru, kuandu ema ruma mate tanba surtu COVID-19 sei labele rekupera.

Primeiru-Ministru, Taur Matan Ruak, deklara Governu iha konsiénsia katak bainhira halo estimasaun ba deklarasaun Estadu Emerjénsia, sei afeta mós ba sidadaun sira nia moris liuliu sira-nia atividade ekonomia.

“Tuir ha’u nia hanoin atividade ekonómika ita bele rekupera iha tempu oin mai, maibé kuandu mate ita labele rekupera. Tanba ne’e opsaun ami nia, ami husu apoiu ba Parlamentu Nasionál (PN) atu autoriza Prezidente Republika dekreta Estadu Emerjénsia”, Tenik Xefe Governu iha plenária PN, segunda ne’e.

Xefe Governu informa, iha 20 abríl Governu propoin ba Prezidete Repúblika atu halo renovasaun deklarasaun Estadu Emerjénsia iha momentu kalamidade públika relasiona COVID-19, ne’ebé komunidade internasionál daudaun enfreta iha mundu tomak.

PM Taur adianta, moras ne’e afeta iha nasaun hotu no ema 200.000 resin ona mak mate no kontinua sai amesa boot ida ba saúde públika iha mundu tomak, liuliu ba país ne’ebé nia sistema saúde mukit hanesan Timor-Leste.

“Ita haree foin daudaun ita halo deklarasaun Estadu Emerjénsia iha semana dahuluk iha kazu ida de’it no stastístika ne’ebé Sentru Integradu Jestaun Krize (CIGC, sigla porotugés) aprezenta ita iha kazu konfirmadu 24, no iha 30 mak hein rezultadu, 483 mak halo ona teste no kazu foun seidauk iha, enkuantu negativu 367 no rekupera ema na’in-neen no mate ita seidauk iha”, nia salienta.

Eis Prezidente Repúblika ne’e observa, país  viziñu sira ho Timor-Leste hanesan Indonézia no Singapura inklui Austrália, sira nia kazu aumenta no kontinua ho estensaun Estadu Emerjénsia to’o fulan-jullu.

“Ne’e signifika katak ita-nia viziñu sira sei problema naturalmente, tanba ne’e se ita la kuidadu bele prejudika fali ita. Tanba haree didi’ak ba kazu sira ne’ebé iha, kazu ne’e mesak importadu hotu”, nia akresenta.

Nune’e, razaun Governu propoin ba Prezidente Repúblika atu estende deklarasaun Estadu Emerjénsia, tanba tuir PM Taur, haree ba sistema saúde Timor-Leste mínimu tebes no númeru kazu aumenta.

Ho nune’e Konsellu Estadu no Konsellu Superiór Defeza fó pareser pozitivu ba Prezidente Repúblika atu renova deklarasuan Estadu Emerjénsia.

“Maibé ita halo renovasaun Estadu Emerjénsia ne’e depende ba autorizasaun husi Parlamentu Nasionál hodi permite atu halo manutesaun medida lubuk ida ne’ebé limita ba ema-nia direitu liberdade no garante direitu fundamentál sira, ne’ebé ita sei estende iha tempu oin mai atu  hakbiit ita responde moras ne’ebé dadaun ne’e iha ita-nia rai”, PM Taur subliña.

Xefe Governu konsidera evolusaun moras ne’e iha mundu iha mudansa signifikante no haree kondisaun Timor-Leste nia geografikamente presiza kontinua Estadu Emerjénsia atu taka dalan ba kontajia afeta ba populasaun sira.

“Signifika katak medida ne’ebé ita toma ne’e mak dalan ida atu miniza kontajia, hahú husi ijiene públiku no individuál, distasiamentu sosiál no konfinamentu hanesan medida ida atubele ajuda diminui propagasaun iha ita-nia sosiedade”, nia afirma.

Deklarasaun Estadu Emerjénsia ho Baze Husi OMS

Governu mós iha ona fleksibilidade ba deklarasaun Estadu Emerjénsia ho baze ba husi Organizasaun Mundiál Saúde (OMS) nian, katak dahuluk país ne’ebé feksibiliza medida deklarasaun Estadu Emerjénsia tenke garante katak COVID-19 ne’e kontroladu, maibe foin mak hahú no seidauk iha menus atu kontrola.

Daruak, Timor-Leste nia sistema saúde tenke iha kapasidade atu dekteta, reziste no lista inklui  trata ba kazu hotu-hotu.

Datoluk, risku surtu ne’e minimiza iha konteksu espesiál ba instalasaun sáude no fatin sira ne’ebé simu ona. Enkuantu, dahaat, medida preventivu ne’ebé Timor-Leste adopta iha fatin servisu, eskola no fatin ne’ebé de’it ema la’o ba tenke di’ak, se hakarak feksibiliza medida Estadu Emerjénsia sira.

Ikus liu, risku importasaun Timor-Leste iha kapasidade atu administra ho di’ak no  komunidade tenke edukadu kompletamente hodi apoia Instituisaun Estadu no Instituisaun Saúde sira ho hakbiit no moris tuir norma ne’ebé situasaun foun obriga.

“Ba medida sira ne’e ita seidauk iha kondisaun, maibé klaru Governu ho apoia husi Parlamentu Nasionál, ita halo esforsu para ita prepara ita-nia an di’ak liu tanba hanesan situasaun foun ida ne’ebé ita mós foin maka infrenta iha ita-nia sistema rasik mós foin enfreta”, tenik Xefe Governu.

Ho nune’e, PM Taur lori Governu nia naran husu Prezidente Parlamentu Nasionál no Deputadu sira atu fó autorizasaun Prezidente Repúblika atu dekreta Estadu Emerjénsia tanba hanesan deputadu sira hatene deklarasaun Estadu Emerjénsia ramata ona iha loron 26 abríl tuku 23:59.

Antes ne’e, Governu mós hahú aprova medida rekuperasaun ekonomia ba sidadaun sira ne’ebé hetan efeitu husi Estadu Emerjénsia iha Timor-Leste liuhosi fundu COVID-19.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here