Primeiru-Ministru, Taur Matan Ruak, akompaña ho membru governu sira, partisipa iha debate kona-ba pedidu estensaun ba Estadu Emerjénsia husi Prezidente Repúblika, iha Plenária Parlamentu Nasionál, segunda 26 Abril 2020. Imajen Tatoli/António Gonçalves

DILI, 27 abríl 2020 (TATOLI) – Primeiru-Ministru (PM), Taur Matan Ruak, agradese ba Prezidente Parlamentu Nasionál (PN) no Deputadu sira tanba liuhosi votasaun iha plenária, fó autorizasaun ba Prezidente Repúblika atu dekreta renovasaun Estadu Emerjénsia hodi prevene propagasaun surtu COVID-19 iha territóriu Timor-Leste.

Hafoin PN halo apresiasaun ba pedidu renovasaun Estadu Emerjénsia, liuhosi rezultadu votasaun nominál, pasa ho rezultadu a-favór 37 kontra 23 no abstensaun 4.

“Ha’u hakarak lori VIII Governu nia naran agradese ba Prezidente Parlamentu Nasionál no na’in Deputada no Deputadu sira tanba bele fó autorizasaun ba Prezidente Repúblika atu bele halo renovasaun ba Estadu Emerjénsia”, tenik PM Taur iha plenária Parlamentu Nasionál, segunda ne’e.

Notísia Relevante: PN Aprova Pedidu Estensaun EE, CNRT Vota Kontra

PR Lú-Olo Dekreta Ona Estadu Emerjénsia Hodi Prevene COVID-19

Eis Prezidente Repúblika, dehan públiku hotu akompaña mundu tomak terus no sofre tanba surtu COVID-19 ne’ebé to’o agora laiha vasina no ai-moruk, tanba ne’e ho desizaun plenária ne’e bele fó biban ba Governu atu kombate moras ne’e.

“Medida di’ak mak kontinua promove ijiene, fase liman no labele ka’er liman, inklui halo distasiamentu sosiál no medida sira seluk, ajuda ita atu reforsa liután ita-nia kbiit hodi enfreta Coronavírus”, Xefe Ezekutivu ne’e afirma.

Liuhosi biban ida-ne’e, PM Taur felisita mós profisionál sira ne’ebé iha liña frente hodi kombate pandemia globál ne’e.

“Ha’u hakarak aproveita oportundade ne’e, agradese ita-nia médiku sira, enfermeiru no enfermeira sira, ajente saúde hotu no ita-nia Militár, Polísia no Bombeiru sira no ita-nia sidadaun sira hotu ne’ebé hamriik iha oin atu ajuda ita kombate vírus ida ne’e. Nasaun no povu tomak iha sira nia kotuk no espera bele iha kbiit atu redús no minimiza risku kontajiu ba nia populasaun”, nia subliña.

Kona-ba populasaun balun ne’ebé hamlaha, Xefe Governu saliente, daudaun Governu prepera ona medida sosiál no ekonómika ne’ebé daudaun ne’e diskute hela mekanizmu implementasaun.

“Ita espera katak iha tempu oin mai, ami bele implementa hodi ajuda ba situasuan ne’ebé ita nia povu hetan”, nia akresenta.

Ba medida ezekusaun deklarasaun Estadu Emerjénsia, PM Taur dehan Governu sei haree hafoin Prezidente Repúblika dekreta.

Maski pedidu autorizasaun ne’e la pasa ho unanimidade, Xefe Governu nafatin respeita pozisaun deputadu sira ne’ebé kontra no abstein tanba sistema demokrasia.

“Governu rejista preokupasaun hotu-hotu no espera katak ita bele hamutuk hetan dalan di’ak hodi ultrapasa situasaun ida ne’e. Tanba ita-nia hakarak ida de’it mak ema labele mate, se karik mate labele barak hanesan nasaun sira seluk nian tanba hamlaha ita sei bele rezolve, maibé Corononavírus ita laiha ai-moruk no vasina”, Xefe Ezekutivu adianta.

Prezidente Repúblika (PR), Francisco Guterres ‘Lú Olo’, hato’o pedidu estensaun estadu emerjénsia ne’e ba Parlamentu Nasionál iha kuarta (22/04).

Nune’e, Xefe Estadu husu fó PN autorizasaun hodi deklara renovasaun ba Estadu Emerjénsia ba territóriu nasionál tomak durante loron 30, hahú hosi 28 abríl, tuku 00:00 to’o loron 26 maiu 2020, tuku 23:59.

Antes ne’e, Konsellu Ministru aprova proposta Estadu Emerjénsia ne’e iha loron 16 marsu no PR Lú Olo aprezenta pedidu autorizasaun ne’e ba PN iha loron 24 marsu.

Entretantu, iha loron 26 marsu, PN halo debate no fó biban ba deputadu ida-idak hodi halo deklarasaun votu nominál ho rezultadu a-favór 64, kontra o abstensaun 0.

Nune’e, iha loron 27 marsu 2020, Xefe Estadu dekreta Estadu Emerjénsia ba dahuluk no entra ein vigór iha 28 marsu, hahú husi oras 00:00 to’o 26 abríl 2020, oras 23:59, kalan fahe rua (meia-noite), ne’ebé Timor-Leste tama ona iha Estadu Emerjénsia atu fó dalan ba Governu implementa médida espesífiku sira hodi kombate COVID-19.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here