Primeiru-Ministru, Taur Matan Ruak, akompaña ho membru governu sira, debate kona-ba pedidu estensaun ba deklarasaun Estadu Emerjénsia husi Prezidente Repúblika, iha Plenária Parlamentu Nasionál, segunda (27/04). Imajen Tatoli/António Gonçalves

DILI, 27 abríl 2020 (TATOLI)—Bankada Partidu Demokrátiku (PD) no Frente Revolusionária Timor-Leste Independente (FRETILIN), husu líder istóriku sira atu tau forsa hamutuk hodi kombate propagasaun surtu COVID-19 iha Timor-Leste.

“Tempu ona funu na’in sira, líder istóriu sira tau forsa hamutuk para hasoru COVID-19 iha Timor-Leste. Tanbasá mak ita labele hamutuk. Hein katak ita hanoin para estende (Estadu Emerjénsia). Ami husu ba prezidente PN atu halo avaliasaun kada semana,”  dehan Deputadu PD, Mariano Assanami ‘Sabino’, liuhosi plenária, iha Parlamentu Nasionál, segunda ne’e.

Tanba ne’e, Assanami husu ba líder istóriu sira hanesan Kay Rala Xanana Gusmão, Marí Alkatiri, Ramos Horta, Primeiru-Ministru, Taur Matan Ruak, atu tuur hamutuk hodi tau forsa hamutuk.

Entretantu, Xefe Bankada Parlamentár FRETILIN, Aniceto Guterres, apela ba forsa polítika hotu-hotu tanba iha momentu ida-ne’e mak tempu atu hatama iha “kuarentena” interese polítika no grupu nian.

“Ami apresia no louva inisiativa sira ne’ebé hakarak atu lori ita-nia líder sira hamriik hamutuk iha luta kontra surtu COVID-19 ne’e no ninia konsekuénsia sira hotu, ekonomia no sosiál. Tempu ona atu líder sira tur hamutuk buka dalan hodi apoiu ba Governu no ekipa ne’ebé iha ona atu ita ultrapasa hamutuk situasaun ida ne’e,”  dehan Aniceto Guterres.

Nia afirma, líder sira presiza halibur hodi fó hanoin no konsellu di’ak sira ba Governu ho nia ekipa atu atua di’ak liután maibé labele sai fali forsa paralela ho Governu maibé husik Governu funsiona ho kapasidade tomak ho ita hotu nian apoia.

Notísia Relevante: FRETILIN-KHUNTO Apoia Pedidu Estensaun EE, CNRT Sei Vota ho Konsiénsia

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here