Grupu Voluntáriu Movimentu Tasi Moos (MTM/MAMA BOLU) koopera ho Konsellu Nasionál Juventude Timor-Leste (CNJTL), Munisípiu Liquiça hala’o atividade rega ai-moruk dezinfeta iha Munisípiu Liquiça. Imajen/Eugénio Pereira

LIQUIÇA, 27 abríl 2020 (TATOLI)- Grupu voluntáriu Movimentu Tasi Moos (MTM/MAMA BOLU) koopera ho Konsellu Nasionál Juventude Timor-Leste (CNJTL) Munisípiu Liquiça, ohin, hala’o atividade rega ai-moruk dezinfeta iha edifísiu importante sira iha Munisípiu Liquiça nian.

Ekipa Voluntáriu Movimentu Tasi Moos (MAMA BOLU) koopera ho Consellu Nasionál Juventude Timor-Leste (CNJTL), Munisípiu Liquiça hasai foto hamutuk ho Komandu Polísia Liquiça, hafoin hala’o atividade rega ai-moruk dezinfeta. Imajen/Eugénio Pereira

Fatin sira ne’ebé ekipa Juventude MTM ho grupu CNJTL rega uluk maka Rezidénsia Profesór Kafee Liquiça, Eskola Kafee no jardín, Merkadu Vila Liquiça, salaun Administrasaun Munisípiu Liquiça no jardín inklui edifísiu Komandu Polísia Munisípiu ho mós transporte públiku sira ne’ebé hala’o movimentu iha sidade Liquiça.

Prezidente CNJTL Liquiça, Laurindo de Jesus dos Santos dehan, atividade rega ai-moruk dezinfeta ne’e hodi prevene surtu Coronavirus ka COVID-19 atu labale hada’et ba abitante Liquiça.

Iha Liquiça rasik rezista ona profesór Portugés na’in rua maka pozitivu COVID-19 no daudaun ne’e halo ona tratamentu saúde iha Sentru Izolamentu Vera Cruz Dili. Nune’e, ekipa CJNTL no Autoridade Munisípiu no PNTL serbisu maka’as tebes hodi halo sosializasaun informasaun ba abitante hotu-hotu hodi kumpre regra Estadu Emerjénsia (EE) no kumpre regra saúde nian ne’ebé ekipa Ministériu Saúde no ekipa COVID-19 sosializa ona.

CNJTL Liquiça mós apresia ho serbisu voluntáriu ne’ebé MTM halo iha Dili too munisipiu sira nu’udar asaun realidade ida atu prevene propagasaun surtu COVID-19.

“Ita haree katak surtu COVID-19 ameasa boot ba mundiál, nune’e ami kria ekipa Movimentu Voluntáriu Liquiça koopera ho MTM mai rega ai-moruk dezinfeta hodi ita luta hasoru peste letál  ne’e,” dehan Prezidente CNJTL, Lourindo ba Tatoli iha Komandu Polísia Liquiça.

Tuir nia, bainhira governu fó sai informasaun katak, profesór Portugés na’in-rua pozitivu COVID-19, autoridade no juventude sira ho voluntáriu buka ajuda mós profesór na’in rua hodi koopera ho ekipa Ministériu Saúde halo asaun para tulun profesór sira atu ba hela iha fatin kuarentena.

Grupu ne’ebé harii tau rasik osan sosa ekipamentu dezinfeta nian sei kontinua rega mós ai-moruk iha postu administrativu sira, sentru saúde, eskola no rezidénsia komunidade sira-nian.

Iha fatin hasan Portavós Interinu MTM, Delson Alves dehan, sira voluntáriu halo serbisu ne’e hodi ajuda estadu Timor-Leste tulun povu atu prevene hosi surtu COVID-19.

Delson hatutan, Movimentu Tasi Moos ba oin sei kontinua rega nafatin ai-moruk dezinfeta ba munisípiu sira seluk ne’ebé risku ba COVID-19.

Jornalista : Eugénio Pereira

Editór       : Francisco Simões

 

HAKEREK NO HATÁN

Please enter your comment!
Please enter your name here