Xefe Suku Caicoli, Hipolito Marques Ximenes. Imajen/Osória Marques.

DILI, 27 abril 2020 (TATOLI)–Xefe Suku Caicoli, Hipolito Marques Ximenes informa, autoridade lokal no komunidade sira iha Suku Caicoli prepara ona dokumentu tu simu subsidiu hosi Governu tanba nia parte halo ona preparasaun dezde inundasaun ne’ebé afeta ba komunidade sira-nia uma iha fulan marsu liu ba ne’e.

“Ami prepara ona dokumentu sira antes ona depois inundasaun akontese iha 13 marsu 2020 komunidade barak mak afetadu ba inundasaun. Nune’e, agora ami kompleta de’it ona ho povu balun ne’ebé foin harii família. Maibé ami husi Suku Caicoli prepara ona dokumentu atu simu subsidiu,” dehan Hipolito Marques Ximenes ba ajénsia TATOLI iha sede Suku Caicoli, Dili, segunda ne’e.

Nia hatutan, la’ós atu hetan subsidiu husi Governu ka Estadu ba COVID-19 mak halo ka prepara dokumentu sira ka dadus maibé Suku Caicoli preparadu nanis ona.

“Ami la’ós atu simu subsidiu Estadu Emerjénsia ba COVID-19 nian husi ita-nia Governu no Estadu ida ne’e maibé ami-nia dokumentu kona ba polulasaun no uma-kain nian iha Suku Caicoli nian ami prepara loos ona. Hein de’it bainhira mak Governu tún fahe subsidiu,” nia dehan.

Iha tinan ne’e mós, tuir nia, autoridade lokál sira dehan ona ba komunidade sira atu halo foun fali dokumentu ba komunidade sira ne’ebé mak dokumentu aat no dodok hotu ne’ebé kauza husi inundasaun.

Komunidade sira ne’ebé foun rejistu iha fulan ne’e, nia dehan, garante katak sei hetan subsidiu tanba sira mós presiza duni atu hetan.

“Tanba komunidade maioria mak iha ona kartaun Xefe família nian, só ida rua mak seidauk halo. Maibé, ami nafatin atende sira atu halo kartaun Xefe família hodi sira mós bele hetan subsídiu hosi ita-nia Governu. Ba ha’u garante maibé husi Governu mak ha’u ladún hatene,” nia dehan.

Totál uma-kain Suku Caicoli, nia informa, hahú hosi tinan 2019 ba kotuk Suku Caicoli iha uma-kain hamutuk 800-resin maibé  to’o agora uma-kain liu ona 900.

“Ha’u-nia ema ne’ebé hela iha Caicoli hamutuk uma-kain 800-resin no sura ho sira ne’ebé foun rejistu mak hamutuk 900-resin. Populasaun ne’ebé iha direitu atu vota ka idade 17 ba leten iha tinan 2017 hamutuk na’in 2.888 maibé iha 2020 sa’e ba rihun 300-resin,” nia informa.

Daudaun ne’e, nia dehan, Suku Caicoli iha Aldeia lima (5) mak hanesan 01 mak Sentru de Unidade, 02-03 mak Sakoko, 04 mak Foho Rai Boot, no 05 Tahu-laran.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here