Plenária Parlamentu Nasionál. Imajen Tatoli/António Gonçalves

DILI, 27 abríl 2020 (TATOLI)—Bankada Frente Revolusionária Timor-Leste Independente (FRETILIN) no Partidu Kmanek Haburas Unidade Nasionál Timor Oan (KHUNTO) apoia pedidu estensaun Estadu Emerjénsia (EE) hosi Prezidente Repúblika, Partidu Congresso Nacional da Reconstrução de Timor (CNRT) sei vota ho konsiénsia.

Xefe Bankada Parlamentár FRETILIN, Aniceto Guterres hateten, atu kombate no halo prevensaun ba surtu Coronavirus (COVID-19) ne’e dalan di’akliu mak implementasaun Estadu Emerjénsia.

“Ita hotu fiar no rekoñese katak Estadu Emerjénsia mak bele kombate coronavirus ne’e tanba nasaun balun prepara aan atu hasoru tán iha parte daruak (gelombang kedua) hosi moras ne’e. Ita kaer nafatin prinsípiu, di’akliu ita prevene duké hein to’o situasaun grave. FRETILIN deklara a-favór ba deklarasaun estadu emerjénsia nasionál,” dehan Aniceto Guterres liuhosi plenária, Parlamentu Nasionál, segunda ne’e.

Tuir nia, ho deklarasaun Estadu Emerjénsia Timor-Leste konsege redús velosidade moras ne’e tanba la hada’et ba ema barak, maski iha ona transmisaun lokál maibé kontroladu.

Xefe Bankada FRETILIN ne’e rekoñese durante fulan-ida komunidade laiha hahan tanba ne’e husu ba Governu atu implementa lalais subsídiu nune’e komunidade bele hela hakmatek iha uma.

Bankada FRETILIN hakarak hato’o apresiasaun boot ba komportamentu populasaun tomak nian ne’ebé ho todan no responsabilidade kumpre duni estadu emerjénsia ne’ebé deklara uluk ona iha loron tolu-nulu liu-ba.

Nune’e mós, FRETILIN apresia mós ba esforsu Governu nian liuhosi Sentru Integradu Jestaun ba Krize ho nia forsa tarefa sira hotu, hodi implementa ho didi’ak Estadu Emerjénsia no medida sira seluk relasiona ho surtu COVID-19 tuir kapasidade no kondisaun ne’ebé Timor-Leste iha.

Bankada FRETILIN mós fó korajen no fó apresiasaun boot FRETILIN nian ba ekipa liña oin ka front line, ba profisionál saúde sira, seguransa no defeza, serbisu limpeza sira no sira seluk tan, ne’ebé durante ne’e ho determinasaun tomak hamriik iha liña oin hodi prevene no mitiga surtu COVID-19.

Aniceto dehan, ho deklarasaun Estadu Emerjensia dahuluk konsege redús velosidade COVID-19 atu da’et ba ema barak. Hahú deklara Estadu Emerjénsia ho kazu pozitivu ida no termina Estadu Emerjénsia dahuluk ho kazu pozitivu na’in-24.

Nia hateten, hosi kazu 24 ne’e rekupera na’in neen (6) no laiha mate. Hosi númeru pasiente COVID-19 ne’ebé iha, sira hotu ho kondisaun moderada no kmaan nune’e seidauk presiza fasilidade kuidadu intensivu sira hanesan oksijéniu no ventiladór.

Xefe Bankada FRETILIN ne’e haktuir, Timor-Leste hetan kazu pozitivu dahuluk ho kategoria kazu importadu, maibé ohin loron ho kazu pozitivu COVID-19 ne’ebé aumenta beibeik muda Timor-Leste nia estatutu ba kategoria transmisaun lokál mezmu ke seidauk iha konfirmasaun katak iha transmisaun iha komunidade.

Haree ba situasaun sira ne’e hotu, momentu ida ne’e duni mak presiza tebes unidade no solidariedade entre timoroan tomak, unidade entre lider sira no polítiku sira hodi hatudu koezaun ita-nian atu enfrenta ameasa surtu COVID-19.

Momentu ba ita atu hatudu solidariedade entre orgaun soberania no instituisaun sira, solidariedade ba Governu ne’ebé ukun no soliedariedade entre ema ba ema, ho nune’e de’it Timor-Leste bele manan Coronavirus nia ameasa ba ita-nia sobrevivensia.

Ikus liu, tuir nia, Bankada FRETILIN hakarak apela ba forsa polítika hotu-hotu, momentu ida ne’e mak tempu atu hatama iha “kuarentena” interese polítika no grupu nian.

“Ami apresia no louva inisiativa sira ne’ebé hakarak atu lori ita-nia líder sira hamriik hamutuk iha luta kontra surtu COVID-19 ne’e no ninia konsekuensia ekonomia no sosiál,” nia hateten.

Aniceto afirma, tempu ona atu líder sira tuur hamutuk buka dalan hodi apoiu ba Governu no ekipa ne’ebé iha ona atu ultrapasa hamutuk situasaun ida ne’e.

“Lider sira presiza halibur hodi fó hanoin no konsellu di’ak sira ba Governu ho nia ekipa atu atua di’ak liután maibé la bele sai fali forsa paralela ho Governu. Husik Governu funsiona ho kapasidade tomak ho ita hotu nian apoiu,” nia dehan.

Entretantu, Deputadu KHUNTO, Luis Roberto hateten, KHUNTO fó apoia totalmente estende estadu emerjénsia ne’e ba loron 30 tán.

“Bankada KHUNTO apoia estende tán deklarasaun estadu emerjénsia ne’e, sempre a-favór bai da-ne’e. Maibé orsamentu ne’ebé aprova ba COVID-19 tenke aselera nune’e populasaun sira bele asesu ona subsídiu,” dehan Deputadu Luis Roberto.

Entretantu, Xefe Bankada Parlamentár CNRT, Duarte Nunes  hateten, Coronavirus ne’e halo mundu tomak nakdoko tanba ne’e CNRT propoin proposta balun hodi tau iha lei ba implementasaun estadu emerjénsia daruak ne’e maibé husu deputadu hosi CNRT vota tuir konsiénsia.

“Ami-nia hakarak mak ne’e, ita halo lockdown ba munisípiu tolu hanesan Covalima, Bobonaro no RAEOA tanba sira ne’e iha fronteira no sira iha posibilidade moras bele tama tán hosi ne’ebá mai. Iha munisípiu tolu ne’e presiza fasilidade saúde hanesan ekipamentu laboratóriu, médiku no tékniku saúde, harii mós infraestrutura ne’ebé adekuadu, no munisípiu sira seluk aumenta mós infraestrura. Bankada fó hanoin ba kolega sira vota tuir idak-idak nia tuir konsiensia,” dehan Xefe Bankada CNRT, Duarte Nunes.

Tuir nia, munisípiu 10 inklui Dili bele loke ona estabelesimentu públiku nune’e komersiante sira bele hala’o atividade hanesan bainbain maibé mantein distansiamentu fíziku, sosiál, no iha públiku tau nafatin máskara no fase-liman.

Bankada CNRT preokupadu ho kapasidade atu kontrola ne’e di’ak ona ka lae, tanba ne’e Governu tenke halo esplikasaun tanba parlamentu aprova ona millaun $150 atu atende ba situasaun ne’e maibé to’o oras ne’e seidauk implementa orsamentu ne’e.

Vise-Xefe Bankada Parlamentár PLP, Francisco de Vasconcelos hateten, nasaun jigante iha mundu mak Estadu Unida Amérika (EUA) maibé tanis tanba propagasaun COVID-19.

“Bankada PLP apoia sein rezerva ba estensaun deklarasaun Estadu Emerjénsia, sé fulan-ida labele, aumenta tán,” dehan Vise-Xefe Bankada PLP ne’e.

Notísia Relevante: Semana Oin, PN Debate Estensaun Deklarasaun Estadu Emerjénsia

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here