Imajen Tatoli/António Gonçalves

DILI, 27 abríl 2020 (TATOLI) – Primeiru-Ministru (PM), Taur Matan Ruak, hateten Estadu Emerjénsia la’ós solusaun, maibé hanesan meiu ida hodi prepara kondisaun atu kombate surtu COVID-19 iha Timor-Leste.

“Estadu Emerjénsia la’ós solusaun, maibé Estadu Emerjénsia hanesan kondisaun ida ajuda ita prepara kondisaun, prepara ita nia-an atu kapasita ita atu responde situasaun liuliu ita-nia sidadaun sira”,  PM Taur deklara iha Plenária Parlamentu Nasionál, bainhira halo diskusaun kona-ba estensaun Estadu Emerjénsia, segunda ne’e.

Eis Prezidente Repúblika rekoñese, daudaun ne’e iha sosiedade nia le’et iha tendensia hahú hateten katak impaktu vírus ne’e halo atividade ekonómiku rai-laran la’o ladún di’ak.

“Entaun di’ak liu valoriza ida ne’e. Ha’u hanoin rasusino ne’e laloos, entre vida no ekonomia ita hili ida ne’ebé? ha’u hili uluk vida, hafoin tuir mai ekonomia. Ha’u hatene situasaun ko’alia kona-ba hamlaha, iha istória Timór ha’u rekoñese iha tinan 1976 to’o 1978 ema mate hamlaha tanba konsikuénsia funu nian”, nia akresenta.

PM Taur rekoñese, durante períodu Estadu Emerjénsia fulan-ida, iha família balun presiza tebes ajuda.

“Ami rekoñese katak iha família balun presiza ita-nia ajuda, tanba ne’e presiza kria kondisaun no kapasidade atu identifika kazu ba kazu atu fó apoiu ba sira, maibé uza ida ne’e hanesan bandeira para jeneraliza ne’e hanesan erru kazu ne’e laloos, ne’e justifikasaun ida ne’ebé ita la eduka ita-nia sidadaun sira. Justifikasaun ida ne’ebé mak inkomprensivu, tanba ne’e maka Governu konsiente impaktu sira hotu, maibé Governu preparadu ho apoiu Parlamentu nian, tanba Governu mesak labele halo buat ida sein apoiu husi Parlamentu”, Xefe Governu salienta.

Nune’e PM Taur realsa, Governu prontu servisu hamutuk ho Parlamentu atu halo buat hotu, la’ós de’it impede, difikulta no minimiza risku espansaun COVID-19 iha Timor-Leste, liuliu minimiza ninia impatu ekonómiku no sosiál sidadaun sira nian.

“Ho ida ne’e, ha’u hakarak husu no reforsa pedidu Prezidente Repúblika nian, atu Parlamentu Nasionál fó autorizasaun fulan ida tan. Asuntu hotu ne’ebé deputadu sira husu atu klarifikasaun iha tempu seluk ami disponível atu mai tan dala-ida para fahe informasaun ba Parlamentu maibé agora ami-nia pedidu estensaun ami hakarak husu Parlamentu bele autoriza atu Prezidente Repúblika bele dekreta Estadu Emerjénsia”, katak PM Taur.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here