Primeiru-Ministru, Taur Matan Ruak, entrega prezente ba ninia omólogu australianu, Scott Marrison, bainhira mai vizita Timor-Leste iha tinan kotuk. Imajen/GPM

DILI, 27 abríl 2020 (TATOLI) – Primeiru Ministru, Taur Matan Ruak, informa foin lalais nia parte halo kontaktu ho ninia omólogu australianu, Scott Marrison, ne’ebé hatudu kompromisu atu apoia nafatin Timor-Leste hodi luta kontra COVID-19.

Iha konversa telefónika durante minutu 12, Xefe Governu país viziñu rua ne’e aprofunda liután relasaun no kooperasaun país rua nian ba oin, ne’ebé Austrália prontu ajuda Timor-Leste ho ekipamentu médiku balun tan no tékniku iha laboratóriu.

“Ha’u rasik iha sesta-feira (24/04), ko’alia ho Primeiru-Ministru Austrália hodi husu apoia maibé nia (Scott Marrison) dehan ba ha’u daudaun ne’e ho situasaun ne’ebé iha sei defísil, maibé buat kiik sira kontinua nafatin apoia hanesan mós país sira seluk atubele hakbiit an hodi enfreta situasaun ida ne’e”, tenik PM Taur bainhira partisipa iha debate Renovasaun ba Deklarasaun Estadu Emerjénsia iha Parlamentu Nasional, segunda ne’e.

Iha loron sesta foin lalais ne’e, Xefe Governu nasaun rua ne’e halo diskusaun ida ne’ebé mahon hodi hato’o sira nia solidaridade no apoia ba dezafíu ne’ebé nasaun rua ne’e hasoru, kauza husi COVID-19 ne’ebé alastra ona ba mundu tomak.

Nune’e mós fahe esperiénsia kona-ba oinsá jere COVID-19 no promete atu kontinua ho asaun ne’ebé efetivu entre Austrália ho Timor-Leste hodi hamutuk luta hasoru surtu vírus ne’e.

Entretantu, PM Taur agradese tebes ba apoiu no solidariedade hosi Governu no povu australianu embora iha Austrália mós hasoru problema COVID-19.

Aproveita konversa telefónika ne’e, Xefe Governu timoroan husu deskulpa ba ninia ómologu australianu tanba labele vizita Austrália iha fulan-abríl hanesan promete ona, relasiona ho propagasaun pandemia globál ne’ebé afeta mundu tomak inklui mos Timor-Leste, no promete sei ajenda ba okaziaun seluk.

Jornalista: Florencio  Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here