Abitante sira fila ona ba sira-nia uma hafoin kumpre kuarentena durante loron 14.Imajen/TATOLI

DILI, 26 abríl 2020 (TATOLI)-Timoroan hamutuk ema na’in 10 iha domingu (26/04/2020) re-integra ona bá sira-nia família tanba livre hosi surtu COVID-19, hafoin kumpre kuarentena obrigatóriu iha Otél Timing Dili.

Abitante na’in 10 kompostu hosi feto na’in rua no mane na’in ualu ne’e tama iha kuarentena Otél Timing iha loron 29 fulan-marsu, no tuir loloos sira livre ona iha loron 14 fulan-abríl maibé mosu kestaun téknika maka tenki adia ba domingu ohin.

Hosi sira na’in 10 ne’e, ema na’in neen hela iha Dili, na’in rua hosi Munisípiu Lautem, na’in ida hosi Baucau no Munisípiu Ermera na’in ida.

“Serimonia ofisiál re-intrega ne’e diferente oituan tanba kompara ho maluk sira iha kuarentena seluk entaun agora daudaun ita haree sira kontenti maski hela kuarentena loron naruk maibé la mosu problema ruma ho pesoál saúde no parte seguransa sira iha ne’e,” informa Diretór Apoiu Jurídiku Kontensiozu Ministériu Saúde, Belarmino da silva Pereira, hafoin serimoni re-integra abitante hirak iha Otél Timing, ohin.

Nia hateten hodi governu nian naran hato’o agresimentu bo’ot ba Timoroan hirak ne’e tanba fó ona kontribuisaun no kolaborasaun di’ak durante sei hela iha kuarentena.

Maski livre ona maibé Diretór ne’e husu nafatin ba sidadaun sira ne’e atu kumpre pontu importante hirak hanesan mantein distánsia sosiál ho família, komunidade no sosiadade bainhira fila ba idaidak nia uma.

“Daruak asegura nafatin ijiéne pesoál ne’ebé durante ne’e implementa iha kuarentena hanesan fase liman bebeik no sabaun atu nune’e liman bele moos hodi proteje ita-nia an husi moras oi oin no uza maskra bainhira ko’alia ba malu,”nia reforsa liután.

Pontu tuir mai maka fani ka me’ar tenki taka ibun ho liman sikun .kontaktu lalais pesoál saúde ka númeru emerjénsia 119 bainhira hetan fila-fali sintoma COVID-19.

Iha biban hanesan Diretór Nasionál Finansa Ministériu Administrasaun Estatál, Valente de Fátima Miranda, agradese ba médiku no profisionál saúde sira tanba fó atendimentu ho pasensia no di’ak ba okupante kuarentena na’in 10 ne’e.

“Ba sira ne’ebé mak bá Munisípiu Ministériu Administrasaun Estatál mantein nafatin halo kordenasaun ho Munisípiu 12 hodi informa nafatin katak ita boot sira to’o ona Munisípiu sira kontinua lori ita boot sira bá idaidak nia suku,” tenik tan.

Nune’e mós okupante kuarentena obrigatóriu, Joni Lewes reprezenta kolega seluk hakarak agradese ba parte hotu-hotu liliu ekipa médiku, seguransa no seluk tanba fó ona atendimentu ba sira durante hela iha kuarentena.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here