Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen Tatoli/Egas Cristovão

DILI, 26 abríl 2020 (TATOLI) – Portavóz Sentru Integradu Jestaun Krize (CIGC, sigla portugés), Rui Maria de Araújo, relata timor-oan sira ne’ebé daudaun ne’e sei iha nasaun seluk, liuliu Indonézia kuandu afetadu ba moras COVID-19 sei hetan tratamentu hanesan mós sidadaun rezidente nasaun ne’e.

Eis Ministru Saúde ne’e afirma, Estadu Indonézia mós loke ona oportunidade ba sidadaun estranjeiru hotu ne’ebé hetan moras iha ne’ebá (Indonézia), bele asesu ba tratamentu hanesan mós sidadaun Indonéziu.

“Iha paíz hotu aplika buat ne’ebé bolu dehan reziprosidade, hanesan ita iha ne’e mós iha profesór portugés sira ne’ebé karik konfirmadu COVID-19 maka ita halo tratamentu hanesan mós ita-nia sidadaun sira”, dehan Portavóz CIGC liuhosi konferénsia imprensa iha Sala Sentru Mídia COVID-19, ne’ebé hala’o iha Sentru Konvensaun Dili (CCD, sigla portugés), domingu ne’e.

Nia esplika liután, reziprosidade maka oinsá atu atende sidadaun husi nasaun ne’ebé la hanesan,  mantein nafatin atendimentu tanba haree ba baze husi akordu internasional ne’ebé iha, liuliu iha área regulamentu internasionál saúde nian.

Atuál Koordenadór Ligasaun Ofisiál ba Forsa Tarefa COVID-19 ne’e salienta, daudaun ne’e Embaixadór Timor-Leste iha Jakarta (Indonézia) haruka ona sirkulár ba timor-oan hotu ne’ebé hela iha Indonézia.

“Sirkulár ne’e kona-ba saida de’it mak Estadu Indonézia deside ona atu fó apoiu ba ita-nia sidadaun sira, se karik sira ninia dokumentu liu ona prazu maka Estadu Indonézia sei fó toleránsia hanesan mós iha Timór ne’ebé fó toleránsia ba sidadaun estranjeiru hotu”, nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here