Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 26 abríl 2020 (TATOLI)-Portavóz Sala Situasaun Sentru Integradu Jestaun Krize (CIGC-sigla portugés) Rui Maria de Araújo esplika to’o oras ne’e públiku sei konfunde ho definisaun hosi liafuan rekupera no provável ba kazu surtu COVID-19 iha Timor-Leste.

Tuir padraun Organizasaun Mundiál Saúde (OMS) fó definisaun katak rekupera bainhira rezultadu teste laboratóriu polimerase chain Reaction ka PCR hatudu negativu dala rua tutuir malu, iha intervalu liuhosi loron ida.

“Indepedentemente husi iha ka lae sintoma ka indepedentemente husi tama iha kategoria konfirmadu ka provável bainhira ninia rezultadu PCR hatudu hanesan temi ona iha leten ita bele konsidera nia rekuperadu husi COVID-19,” dehan Rui Maria de Araújo, durante konferénsia imprensa, domingo ohin.

Alende rekuperadu, nia tenik tan iha mós kazu provável, bainhira teste laboratóriu ninia rezultadu indetermina katak nia konfirmadu COVID-19 ka lae. Nune’e mós ema ne’ebé tama iha situasaun la permite ka seidauk halo ezame laboratóriu.

Rezultadu PCR indeterminadu , bainhira téknika analiza PCR utiliza metodu sofistifikadu nivél molecular hodi identifika ‘genetik footprint’ (ainfatin genetiku) hosi virus SARS CoV-2.

Tuir Doutór Rui Maria de Araújo katak iha gene rua maka persiza identifika iha analiza PCR maka RNA E-Gen ho RdRp Gen.

“Ita dehan rezultadu indetermina bainhira hatudu katak iha de’it RNA E-Gen no ita dehan rezultadu deteta ka pozitivu ka konfirmadu bainhira gene rua ne’e iha hotu,”tenik tan

Maibé hosi prespetiva klínika hateten rezultadu rua ne’e hotu hatudu katak virus SARS-CoV-2 prezente iha amostra ka espésime ne’ebé foti hosi ema ne’e, maibé indeterminadu tanba gene ida de’it signifika infesaun iha ona faze atu hakat ba negativu.

“Tanba ne’e bainhira hetan rezultadu dala rua tutuir malu negativu hosi rezultadu inisiál “indeterminadu” ita konsidera moos nu’udar rekuperadu ,”tenik tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here