Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 26 abríl 2020 (TATOLI) – Portavóz Sentru Integradu Jestaun krize (CIGC-sigla portugés), Rui Maria de Araújo, hateten Ministériu Saúde (MS) hamutuk ho CIGC presiza tan tempu hodi halo prevensaun no metigasaun ba surtu COVID-19 iha Timor-Leste.

Maibé kona-ba atu halo estensaun períodu Estadu Emerjénsia, ne’ebé sei termina iha domingu (26/04) tuku 23:59, tuir eis Ministru Saúde ne’e hanesan desizaun polítika ne’ebé órgaun soberanu sira maka sei haree, tanba realidade sirkulasaun vírus la haree husi iha ka laiha Estadu Emerjénsia, vírus ne’e la’o nafatin.

“Husi perspetiva CIGC iha nesesidade atu ita trava ema husi li’ur labele tama lai, tanba iha fulan ikus nia laran ho desizaun suspende ema tama husi fronteira ajuda tebes Ministériu Saúde inklui ministériu sira ne’ebé apoia Ministériu Saúde ninia servisu, atu jere didi’ak kuarentena hodi nune’e kazu sira ne’ebé deteta ne’e restritu ba iha fatin kuarentena ninian. Ne’e fatór pozitivu boot ida”, hateten Portavós CIGC liuhosi konferénsia imprensa iha Sala Sentru Mídia COVID-19, ne’ebé hala’o iha Sentru Konvensaun Dili (CCD, sigla portugés), domingu ne’e.

Atuál Koordenadór Ligasaun Ofisiál ba Forsa Tarefa COVID-19 ne’e adianta, téknikamente husi perspetiva MS nian no mós CIGC importante nafatin suspende ema husi li’ur labele lai tama mai Timór, tanba MS ho ministériu téniku sira seluk liuhosi koordenasaun CIGC nian presiza tan tempu hodi aumenta kapasidade atubele teste ema barak liután, bele prepara fatin tratamentu, liuliu ba ema sira ne’ebé grave no krítiku.

“Ita Timór ema fumadór ne’ebé barak tebes, hemu tua mós barak tebes ne’ebé presiza fasilidade sira ne’e. To’o agora ita seidauk konsege halo buat barak iha área ida ne’e, husi perspetiva tantu Ministériu Saúde no ministériu tékniku ida ne’ebé apoiu ba prosesu prevensaun no metigasaun COVID-19 hanoin katak presiza tan tempu atu bele hadi’a ida ne’e”, esklarese Rui.

Nia informa, daudaun ema iha kuarentena redús ba 400-resin no presiza fasilita atu identifika karik iha ema pozitivu iha kuarentena nia laran.

Rui realsa liután, Governu nia difikuldade maka oinsá atu identifika bainhira ema ruma iha ona komunidade nia le’et ne’ebé hetan ona vírus ne’e.

“Husi Liquiçá hahú kedas iha loron balun liubá, esplika bebeik katak iha sentru saúde no óspitál lubuk ida halo ona triajen. Triajen ne’e katak halo selesaun ba ema sira ne’ebé hatudu sintoma no iha istória halo viajen ba fatin ne’ebé afetadu ka iha istória kontakta ho ema ne’ebé pozitivu”, nia akresenta.

Portavóz refere liután, kona-ba vijilánsia sintinela katak buka tuir ema ne’ebé iha infesaun respiratória aguda maibé laiha istória viajen ka laiha istória kontaktu ho ema pozitivu.

“Hodi nune’e bele haree karik iha ona ema ruma pozitivu iha komunidade, esforsu ne’e mak halo hela no presiza espande ba iha munisípiu téknikamente, nune’e atubele halo ida ne’e presiza reforsa kapasidade, presiza ema tur hakmatek iha fatin no labele halo movimenta ba-mai lai”, nia salienta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here