Hosi:

Memensio Sequeira Freitas*)

Hanesan Estadu Direitu Demokrátiku (artigu 1 KRDTL), Timor-Leste adota sistema demokrasia atu bele hili ninia reprezentante sira ba okupa kargu polítika hodi bele deside distinu Povu no Nasaun nian. Kada tinan lima, povu sempre ezerse ninia direitu ba vota ba partidu polítiku sira ne’ebé sira sente merese atu kaer ukun no bandu.

Demokrasia dala barak temi nu’udar sistema ne’ebé provável liu atu realiza bem star sosiál (social walfare). Maibé, nu’udar sistema, dala barak demokrasia mós hamosu defeitus balu iha vida polítika.

Matenek Na’in Goenawan Mohammad iha ninia artigu “Demokrasi dan Kekecewaan”, sita katak demokrasia dala barak dada prosesu polítika ba iha konsensu “mais votadu”. Max Weber, sosiólogu alemaun (inísiu sékulu XX) deskreve metáforamente sobre polítika nu’udar prosesu ida ne’ebé naruk no kansativu.

Mezmu nune’e, presiza nafatin polítika atu organiza sosiedade ida plurál. Iha kontestu simples liu, demokrasia mak sistema ida ne’ebé posível liu atu hamosu lideransa reprezentantivu sira. Tanba ne’e, Estadu liu hosi órgaun komptente sira sempre organiza eleisaun iha kada tinan lima atu povu bele ezerse sira-nia direitu sívika hodi ba vota.

Iha Eleisaun Parlamentar 2017, povu hili nia reprezentante sira atu ba tuur iha Parlamentu Nasionál hodi bele hamoris Governu dahitu. Rezultadu eleisaun hatudu povu nia vontade atu obriga partidu sira halo negosiasaun polítika hodi bele hetan aliansa maioria ida, tanba la iha partidu ida mak manan ho maioria absóluta.

Liuhosi konsulta polítika ne’ebé la’o kuaze fulan ida hosi partidu polítiku sira ne’ebé liu bareira ba Parlamentu Nasionál, ikus mai Prezidente Repúblika nomeia doutor Marí Alkatiri nu’udar Primeiru Ministru ba Governu koligasaun minoria, FRETILIN-PD.

Hafoin formasaun Governu, tuir artigu 108 KRDTL, Governu aprezenta nia programa ba Parlamentu Nasionál atu halo apresiasaun. Artigu 109 KRDTL fó mandatu ba Parlamentu Nasionál halo apresiasaun ba programa Governu refere.

Buat interesante ida ne’ebé mosu iha momentu ne’ebá mak bankada sira opozisaun nian (CNRT, PLP no PKHUNTO) forma tiha Aliansa Maioria Parlamentar ida hodi sai opozitor forte hasoru programa Governu.

Ikus mai, bankada opozisaun liu hosi Mosaun Sensura (tuir artigu 111) halo programa Governu refere la pasa. En fín, ho konsulta oin-oin ne’ebé Prezidente Repúblika halo ho entidade hotu-hotu, haktuir ba artigu 86 alineia f, Prezidente Repúblika disolve Parlamentu Nasionál iha loron 26 fulan janeiru tinan 2018 aumezmu tempu desidi atu povu ba vota fila fali iha Eleisaun Antisipada.

Iha loron 12 fulan maiu tinan 2018, povu vota fila fali iha Eleisaun antesipada. Rezultadu indika Aliansa Mudansa ba Progresu manan ho kadeira 34 no sira iha direitu atu kaer ukun. Iha loron 22 fulan Juñu tinan 2018 iha Palásiu Nobre Lahane, Prezidente Repúblika fó pose ba PM ho nia membru Governu sira.

Enkuantu Xanana Gusmão ho sira seluk la marka prezensa iha tomada de pose tanba Prezidente Repúblika rejeita (empodera) hela membru Governu indijitadu na’in sia (9) ho razaun relasiona ho justisa (buat ne’ebé públiku tomak hatene mós). Situasaun ida ne’e hanaruk tan impase polítika hosi tinan 2017 mai.

Governu Aliansa Mudansa ba Progressu konsege la’o to’o fín 2019 mezmu la’o de’it ho kadeira ain tolu. Diálogu naruk entre PM no PR la konsege lori rezultadu pozitivu ba Membru Governu pendente sira. Iha Dezembru tinan 2019, Primeiru-Ministru, Taur Matan Ruak, aprezenta fila fali proposta Lei Orsamentu Jerál Estadu ba tinan fiskál 2020 nian ba Parlamentu Nasionál.

Simplesmente, iha loron daruak (loron 3 fulan dezembru tinan 2018) Primeiru-Ministru obrigatoriamente deside retira proposta OJE tanba hetan reasaun maka’as hosi opozisaun, maibé liu-liu mós hosi bankada Governu rasik (liu-liu bankada CNRT).

Iha inísiu tinan 2020, ezatamente iha loron 15 fulan janeiru tinan 2020, Parlamentu Nasional hala’o fila fali diskusaun jeneralidade ba proposta OJE hosi Governu ho montante biliaun $1.668 (se não me enganho). Infelizmente, iha loron datoluk ba diskusaun jeneralidade, OJE xumba iha PN ho votu a favor 13, kontra 15 no abstensaun 25 (kuaze bankada CNRT hotu vota absntensaun no kontra 1). Hafoin OJE xumba, Primeiru Ministru deklara katak AMP la eziste ona, CNRT mak baku mate no nia rasik mak hakoi.

Impase polítika aumenta naruk no obriga Governu tenke la’o de’it ho orsamentu duodésimu. Primeiru-Ministru ikus mai hatama ninia karta demisaun ba PR, maibe tanba la hetan aseitasaun hosi PR, to’o ikus PM rasik retira ikas ninia karta demisaun refere. Literalmente, impase polítika katak situasaun ida difisil sein solusaun no hasoru reskaldu (dalan kloot), no ita seidauk hatene solusaun di’ak saida loos mak sei mosu atu solusiona no hakotu impase ida ne’e. Enkuantu povu hein, polítiku sira sei hafuhu malu no ida-idak buka hela atu hadau sira-nia trompu polítika iha situasaun ida ne’e nia laran.

Enkuantu seidauk iha solusaun, Timor-Leste sai mós ameasadu ba surtu Coronavirus (COVID-19). Ameasadu tanba viajen tama-sai Timor-Leste ne’ebé sempre akontese loron ba loron. Governu no Estadu tomak ho rekursu finanseiru ne’ebé limitadu tenta halo prevensaun oin-oin liuhosi Ministériu Saúde, hodi moras aat ida ne’e la tama rai doben Timor-Leste. Infelizmente, iha loron 21 fulan Marsu tinan 2020, eiz Ministra Saúde interina, dra. Elia dos Reis Amaral deklara ba públiku katak kazu COVID-19 tama ona iha Timor-Leste.

Hafoin deklarasaun ida ne’e, públiku tomak pániku no preokupadu. Ezijénsia atu taka aeroportu no liña fronteira sira mai nabnaban. Sidaudaun balu ezije atu Estadu dekreta Estadu Emerjénsia, enkuantu ideia kontráriu barak mós mosu kona-ba ejijénsia ida ne’e. Tuir prosedimentu legál, bainhira PR atu dekreta Estadu Emerjénsia, pelumenus iha etapa legál balun mak tenke atravesa. Etapa sira ne’e mak henesan:
1.) Governu hato’o pedidu ba PR
2.) PR halo konsulta no rona Konsellu Estadu no Konsellu Superiór Defeza no Seguransa,
3.) PR solisita Estadu Emerjénsia ba PN atu hetan aseitasaun
4.) PN haruka fila fali rezultadu ba PR
5.) PR dekreta Estadu Emerjénsia.

Estadu Emerjénsia ka koñesidu antigamente ho Staat van Oorlog en Beleg (SOB) ka ho lian inglés State of Emergency mak dekretu ida hosi Estadu (Xefi Estadu) ne’ebé muda provizoriamente funsaun sira Estadu nian, alerta ba ninia sidadaun sira atu muda ka hapara sira-nia atividade, ou fó órden ba instituisaun sira Estadu nian atu planeia no implementa medida preventiva sira iha situasaun emerjénsia nia laran. Normalmente, situasaun ida ne’e mosu bainhira akontese dezastre naturais ka surtu ruma, konfrontasaun sivil ka iha deklarasaun ba funu nian.

Tanba haree katak surtu COVID-19 ida ne’e bele oho ema barak (bazeia ba esperiénsia sira nasaun seluk nian), mak iha loron 27 fulan marsu tinan 2020 (hafoin liu hosi prosedimentu legál sira), Prezidente da Repúblika liuhosi Dekretu Prezidensiál nú. 29/2020 deklara Estadu Emerjénsia durante loron-30, hahú husi oras 00.00 husi 28 marsu 2020 to’o oras 23.59 26 abril 2020.

Tuir artigu haat hosi Dekretu Estadu Emerjénsia nian ne’ebé hakerek na’in hetan asesu, Estadu limita populasaun sira-nia direitu hanesan: sirkulasaun internasionál, liberdade ba sirkulasaun no fixasaun hosi rezidénsia iha kualkér pontu territóriu nasionál, direitu ba reuniuan no manifestasaun sira, suspende atividade relijioza sira-nian, direitu ba rezisténsia nian (ativa ou pasiva), direitu ba propriedade no inisiativa ekonómiku privada no direitu atu hala’o serbisu ba traballadór sira nian.

Maibé Estadu Emerjénsia la afeta ba kazu sira hanesan direitu atu moris, integridade fízika, kapasidade sivil no sidadania, retroativa ba lei penal, defeza iha prosesu kriminal, liberdade ba konsiénsia no relijiaun, laiha sujeisaun ba tortura, eskavatura no servidaun, laiha sujeisaun ba iha tratamentu ka kastigu todan, dezumanu ka degradante ruma no la iha diskriminasaun.

Hafoin deklarasaun Estadu Emerjénsia, Governu define kedas medida preventiva sira no Governu mós kria daudaun kondisaun sira atu bele atende sidadaun sira-nia preokupasaun liuhosi esforsu oin-oin. Estadu Emerjénsia ba faze dahuluk atu ramata ona maibé Estadu sei prepara hela mós kondisaun ba dekretu Estadu Emerjénsia faze daruak nian.

Sidadaun balu hahú lamenta no preokupadu ho situasaun ida ne’e, tanba Estadu Emerjénsia ida ne’e afeta tebes ba sira-nia rendimentu ekonómiku, nune’e susar ba sira atu kontinua auguenta ho situasaun difisil ida ne’e.

Atu responde preokupasaun hirak ne’e, Governu deside ona polítika renumerasaun balun hanesan fó ona no sei kontinua fó pulsa eletrisidade gratuita ba uma-kain sira, subsidia kada uma kain ho montante $100.00 (ba populasaun baibain no ba funsionáriu públiku ne’ebé nia saláriu menus hosi $500.00 no prosesu la’o hela) no atu ajuda selu pursentu 60 ba saláriu hosi traballador setór privadu sira-nian. Ita-nia problema mak pandemia aat ida ne’e tama mai iha kedas momentu ida ne’ebé Estadu enfrenta hela IMPASE POLÍTIKA.

Maibé, Estadu Emerjénsia tenke kontinua la’o no esforsu lubuk ida tan mak Governu presiza halo tan atu hatan ba preokupasaun povu nian ne’ebé mosu ho fundu ba CoOVID-19 ne’ebé aprova ona iha Parlamentu Nasionál loron 2 fulan abril tinan 2020 ho montante millaun $250.00 (millaun $100.00 aloka ba reforsa kofre Estadu enkuantu millaun $150.00 aloka ba kombate COVID-19). Ba ida ne’e, Governu forma tiha ona Konsellu Jestaun ba fundu COVID-19, nune’e ita tenke iha pasiénsia atu hein Governu nia servisu.

Esforsu sira ne’e hotu tanba Governu no Estadu lakohi nia povu mate ba moras aat ida ne’e, aumezmu tempu lakohi mós atu povu mate ba hamlaha. Mai, ita hotu luta hamutuk kontra Surtu COVID-19 iha ita-nia rain Timor-Leste.

Bele dehan katak, entre impase polítika, Surtu COVID-19 no Estadu Emerjénsia lori konsekuénsia lubuk ida ba vida demokrasia Povu no Estadu ida ne’e nian. Situasaun ida ne’e, koko liu tan Povu no Nasaun ida ne’e nia pasiénsia no sakrifisiu atu kontinua luta hanesan hatudu tiha ona iha tinan 24 nia laran hodi luta ba konkista INDEPENDÉNSIA TOTÁL. Se uluk de’it ita bele, tanbasá agora ita tenke rekua!?! Obrigadu barak..!

*) Hakerek na’in nu’udar profesór ida iha Escola Sekundária Públika Olocassa Ossú (Vikeke) no hela iha Ossú.

HAKEREK NO HATÁN

Please enter your comment!
Please enter your name here