Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen Tatoli/Egas Cristovão

DILI, 26 abril 2020 (TATOLI)Sentru Integradu Jestaun Krize (CIGC, sigla portigés) liuhosi Sala Situasaun, apela ba populasaun sira atu para fuma no hemu tua kuandu lakohi hetan hetan moras COVID-19 ne’ebé ho grau grave ka kríitiku.

“Se lakohi atu hetan moras COVID-19 ne’ebé grave ka krítiku, halo favór para ona fuma sigaru no para ona hemu tua”, dehan Portavóz CIGC, Rui Maria de Araújo liuhosi konferénsia imprensa iha Sala Sentru Mídia COVID-19 ne’ebé hala’o iha Sentru Konvensaun Dili (CCD, sigla portugés), domingu ne’e.

CIGC hakarak apela mós katak, bainhira iha sintoma infesaun respiratoria aguda hanesan, isin-manas, kakorok moras, mear, inus-been, ruin ki’ik no boot siin hotu, tenke ba konsulta iha sentru saúde ka óspital sira.

Aleinde ne’e kolabora no partisipa ho disiplina iha distansiamentu sosiál no distansiamentu fíziku inklui íjiene no mós protesaun pesoál.

“Labele haluha tuur hakmatek iha uma, lalika sai arbiru ka halibur malu bebeik, fase liman bebeik ho sabaun, labele kose liman ba mata, inus ho ibun, uza máskra bainhira sai husi uma”, dehan Rui.

GIGC mós husu ba sira ne’ebé kompleta ona loron 14 iha kuarentena no integra ona ba komunidade, bainhira sente iha sintoma karik tenke kontaktu ba pesoál saúde sira liuhosi númeru telefone 119.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here