Timoroan Na'in lima sai ona hosi Fatin Izolamentu Sentru Saude Vera Cruz. Imajen/Egas Cristovao

DILI, 25 abríl 2020 (TATOLI)–Timoroan na’in-lima iha sábadu ne’e fila ona bá sira-nia família hafoin halo tratamentu saúde tanba konfirmadu no provável COVID-19 iha sala izolamentu Sentru Saúde Vera Cruz Dili.

Portavóz Sala Situasaun Sentru Integradu Jestaun Krize (CIGC-sigla portugés), Sergio Lobo informa hosi pasiente na’in-lima ne’e, na’in ida antes ne’e pozitivu Coronavirus no na’in haat seluk provável.

“Sira na’in-lima iha izolamentu ne’e liberta ona husi COVID-19 tanba rezultadu husi teste daruak  negativu hotu, tanba ne’e sira bele fila ona bá uma,” katak Sergio Lobo ba jornalista sira iha Sentru Saúde Vera Cruz, Dili, ohin.

Timoroan na’in-lima ne’e kompostu hosi feto na’in-tolu no mane rua, maihosi Munisípiu Dili, Viqueque no Manufahi.

“Sira iha imunidade di’ak tanba ne’e mak sira rasik bele oho duni virus ida-ne’e iha sira-nia isin laran,” hatutan Eis Ministru-Saúde iha Governu Konstitusionál daneen.

Sergio Lobo reprezenta Governu hato’o agradesimentu ba timoroan hirak-ne’e tanba sira ho pasensia hodi simu tratamentu saúde ba prevensaun surtu COVID-19 iha Timor-Leste.

Iha biban hanesan, pasiente rekuperadu ne’ebé lakohi fó-sai ninia identidade hateten sira konsege rekuperadu tanba imunidade isin maka di’ak hodi luta kontra moras refere.

“Ami konsege ultrapasa situasan sira-ne’e tanba ami iha imunidade ida-ne’ebé forte no konsege luta hasoru surtu COVID-19 ne’e ikusmai bele oho duni virus ne’e iha ami-nia isin laran,”tenik tan.

Sira mós agredese ba profisionál saúde sira ne’ebé fó atendementu ho di’ak durante izola iha fatin izolamentu Sentru Saúde Vera Cruz.

Jornalista : Tomé Amado

Editór     : Agapito dos Santos

HAKEREK NO HATÁN

Please enter your comment!
Please enter your name here