Ministra Finansa ein ezersísiu, Sara Lobo Brites. Imajen Tatoli/Egas Cristovão

DILI, 25 abril 2020 (TATOLI)Konsellu Jestaun Fundu COVID-19 realiza reuniaun ba dala-rua hodi aprova proposta sira ne’ebé hetan ona apresiasaun husi Komisaun Interministeriál no Konsellu Ministru foin lalais durante períodu Estadu Emerjénsia ligadu ho surtu COVID-19 iha Timor-Leste.

Proposta ne’ebé Konsellu Jestaun Fundu COVID-19 nian aprova, inklui mós proposta kona-ba subsídiu ba estudante naun bolseiru sira iha rai-li’ur.

Maski nune’e, Komisaun Jestaun Fundu seidauk bele pronúnsia montante loloos husi subsídiu ne’e kada estudante sira, tanba sei hein proposta rezolusaun husi Ministériu Negósiu Estranjeiru no Kooperasaun (MNEK) no tenke hetan aprovasaun husi Konsellu Ministru, hafoin haruka filafali ba Konsellu Jestaun hodi halo distribuisaun, tanba kustu vida kada nasaun ne’ebé estudante sira ne’e hela ba la hanesan.

“Ami diskute mós proposta husi MNEK, kona-ba atribuisaun subsídiu ba estudante sira iha rai-li’ur, entaun konsellu aprova de’it ninia montante globál ne’ebé mak prevee tiha ona programa no sub-programa, maibé sei nafatin presiza desizaun ba atrubuisaun kada estudante tuir kustu vida iha nasaun ida-ida”, hateten Ministra Finansa ein ezersísiu, Sara Lobo Brites hafoin reuniaun Konsellu Jestaun Fundu COVID-19 iha Salaun Ministériu Finansa, Aitarak-laran, sábadu ne’e.

Antes ne’e, ezekutivu sira liuhosi reuniaun Konsellu Ministru aprova ona Rezolusaun Governu hodi fó atribuisaun subsídiu ba timor-oan ne’ebé mak hela iha estranjeiru, relasiona ho surtu ne’e rasik.

Husi diploma ne’e estabelse mekanizmu ida atu apoiu no fó protesaun ba sidadaun sira iha estranjeiru, hodi bele suporta despeza loron-loron nian no ba sira ne’ebé depende de’it ba rendimentu família nian.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here